Il congrès di Flumisel La Vila de Societât Filologjiche Furlane pal 2020

Inte Ete dal Covid-19 la Societât Filologjiche Furlane e je rivade istès di meti adun il 97 in Congrès dai socis. Al è capitât a Flumisel La Vila, che par talian al sarès “Fiumicello-Villa Vicentina”. La riunion in presince si è davuelzude inte sale “Bison”, ai 4 di Otubar dal 2020. Prime si è tacât, a lis 9, cu la messe inte glesie di San Valantin, celebrade di don Dario Franco, cun mascarinis, savon licuit pes mans, distanziament sociâl e librut di preieris discjamât via email.

Flumisel La Vila - Intervent de sindiche Laura Sgobin; tal mieç Federico Vicario e, in bande, Ferruccio Tassin

A lis 10 in plaçâl dai Tigli si è sintût e viodût il bon acet in musiche par cure de bande “Tita Michelas”, direzude dal mestri Giorgio Cannistrà. Daspò i socis a si son metûts in file par jentrâ te sale dal congrès. No son plui i timps di salis plenis di int. Cumò si jentre dopo di vê misurât la fiere. Chei de Protezion Civîl (guai se a no fossin!) a ti metin in rie tant che tancj fantacins a un metri di distance un di chel altri. Dopo si à di scrivi un modul plen di crosutis. La uniche robe che no mi àn domandât al è il numar des scarpis, pal rest chei di Flumisel La Vila a san dut di me… ancje se ài spudacjât îr di sere.

Si è davuelzût cussì a Flumisel La Vila il 97in congrès de Societât Filologjiche Furlane, nassude a Gurize tal 1919. Si che duncje al si è passât il 100in inovâl de socie simpri plui indaûr a butâsi su lis ativitâts telematichis. Pensait che ae Scuele di Avost, dulà che par solit a erin 100 iscrits in presince, chest an, che si faseve dut su le taule on line (midiant Internet) i iscrits insegnants a son stâts passe 300 di lôr.

A àn cjantât te sale “Bison” di Vie Gramsci, chei dal grup corâl “Lorenzo Perosi”, direzût dal mestri Fulvia Miniussi. Oltri a Stelutis Alpinis di Arturo Zardini a si son scoltadis lis cjantis di chescj artiscj: Narcisio Miniussi, Cecilia Seghizzi e altris.

La bande "Tita Michelas"

Aes 11 e à tacât il congrès cul salût dai sorestants. E à cjacarât in marilenghe, par prime, il sindic di Flumisel La Vila, Laura Sgubin, dute braurose di ospitâ la Filologjiche pe prime volte. La Sgubin è à fevelât di “une ocasion di identitât pal paîs di Ugo Pellis, autôr dal Atlant Linguistic Italian”. Flumisel La Vila al è impuartant propit parcè che al è il teritori là ch’al nassè Ugo Pellis (1882-1943), benemerit dai studis furlans e un dai paris de Societât Filologjiche Furlane. Lui al è stât president de socie dal 1920 al 1923. Al à puartât il salût par furlan ai socis Tiziano Portelli, president de Cjasse rurâl dal Friûl Vignesie Julie.

Piero Mauro Zanin, president dal Consei regjonâl dal Friûl Vignesie Julie, al à fat un discors par talian. “Riconosco – al à dit – che la Società Filologica Friulana ha sviluppato e valorizzato la lingua friulana e il sentimento di appartenenza territoriale; è importante che il friulano sia insegnato nelle scuole”. Zanin al à ancje memoreât la cressite des oris in marilenghe tes trasmissions de Rai in radio e, buine gnove, la scree par television. Zanin al à ancje berghelât par fâ nassi un centri di produzion de RAI par furlan a Udin, par fâ il telegjornâl in marilenghe, tant ce che a fasin pai slovens.

Guido Germano Pettarin, deputât de Republiche elet a Flumisel, al à dit di “difindi la nestre lenghe, parcè che o sin furlans e europeans”. Pettarin al si bat tal parlament talian parcè che si voti la Cjarte europeane des lenghis minoritariis jenfri il 2023.

Grup corâl “Lorenzo Perosi”, direzût dal mestri Fulvia Miniussi

L’intervent centrâl “intun contest cussì dificil” al è stât la relazion dal professôr Federico Vicario, president de Societât Filologjiche Furlane. “O saludi ducj i rapresentants des istituzions furlanis – al à zontât Vicario – ch’a son chi cun nô. Dutis istituzions simpri dongje al nestri Istitût par ativâ colaborazions e inviâ progjets a pro de comunitât”. Tra lis variis esponents politics si è viodût Fabrizio Cigolot, assessôr ae Culture dal Comun di Udin; ancje Pordenon e Gurize a erin rapresentadis.  Daspò Vicario al à memoreât il ricercjadôr de universitât Giulio Regeni, copât dai polizais in Egjit, cence che nus contin la veretât; in sale a erin presints i gjenitôrs di Giulio ancjemò in spiete di justizie.

A chest pont al è stât presentât cuntun snait dut particolâr il Numar Unic “Flumisel La Vila” par cure di Ferruccio Tassin, un libri plen di gnovis sul paîs. Si fevele di 550 pagjinis, cun 40 contribûts scrits di passe 30 autôrs su la storie, l’ambient e la int dal teritori. Il program al proviodeve ancje un intervent di Nedi Tonzar cul titul: “Flumisel La Vila, di dulà che al ven, dulà che al va. Parcè visâsi dal ambient”. Il libri al è stât une vore agradît dal public.

Il regjist Dorino Minigutti (ultin a drete inte fotografie su disore) al à presentât, par talian, il so documentari “Ugo Pellis e l’Atlante della memoria”. Dilunc di dôs seradis a Flumisel (Sale Bison, martars ai 6 di Otubar dal 2020) e a La Vila (Sale Polifunzionâl, martars ai 13 di Otubar) al vignarà ancje presentât il Numar Unic "Flumisel La Vila".

Il gustâ in compagnie si è tignût li dal ristorant “Ragno d’Oro”, par passe 50 di lôr. Dopo di gustât, a lis cuatri: su la mascarine e vie a cjase. Apontament pal 2021, cul 98ⁱⁿ congrès, a Vençon. Cence Covid-19, sperin!

                    Al fevele Vicario

--

Servizi gjornalistic, fotografic e di butâ dentri tal blog in Internet ("networking") par cure di Elio Varutti. Letôr: Sebastiano Pio Zucchiatti. Graciis a Feliciano Medeot, diretôr de Societât Filologjiche Furlane.

IL DISCORS DAL PRESIDENT AL CONGRÈS DI FLUMISEL LA VILA  Flumisel La Vila, ai 4 di Otubar dal 2020, par leilu, frache culì.

Fieste a Colorêt pal 95in congrès de Societât Filologjiche Furlane

Tal 2021 si screarà il Cjistiel tirât sù dopo dal taramot. Cheste è je une biele gnove saltade fûr dal 95in congrès de Societât Filologjiche Furlane. 

Federico Vicario al 95in congrès de Filologjiche. Fotografie di Elio Varutti

La socie si è cjatade a Colorêt di Mont Alban cuntun slavin di aghe come no mai. Tant che i socis e la int dal paîs a rivavin tal Centri polifunzionâl di Mels e a metevin in bande la ombrene strafonde al è stât il bon acet de Filarmoniche di Mels, screade tal 1905 e direzude cumò dal mestri Mario Castenetto, cu la zonte di Caterina Minisini. Al è stât un piçul conciert di musichis ancje modernis che a àn tirât sù la petorine.

Luca Ovan, sindic di Colorêt, al à tacât il so discors in marilenghe “parcè che si scugne fevelâ furlan in cjase e tes istituzions e o sin contents che la Filologjiche e sedi chi pal so congrès e je la prime volte che si ten a Colorêt”.

Paola Molinaro, presentadore de zornade, oltri che assessôr ae Culture dal Comun di Colorêt, e à passât la peraule a Davide Boeri, president dal Grup Zovins di Confindustrie di Udin. Boeri al à cjacarât un tic par furlan e dopo par talian su la impuartance dai industriâi che a dan i finanziaments ae culture, ancje cul jutori de leç par discjamâ tal belanç de imprese chei bêçs.

Il bon acet de Filarmoniche di Mels

Anna Pia De Luca, vice president dal Ente Friuli nel Mondo, nassût tal 1952 di une cueste de Filologjiche, è à puartât il salût dal sô president Adriano Luci. “Chest al è un paîs dulà che al è un plasè vivi – al à dit Giuseppe Morandini, president de Fondazion Friûl – e o auguri ae Filologjiche di fâ une lungje strade dutun cu la Fondazion Friûl, stant il fat de convenzion plurienâl che o vin stipulât pe culture di chenti”.

A chest pont Gian Camillo Custoza, al à fat il so intervent tant che da program cul titul Storie e vicendis dal Cjistiel di Colorêt. Di une struture militâr dal Tresinte e je deventade une residence zentîl, di caratar culturâl. Custoza al à nomenât la Cjarte di Cracovie, par memoreâ che un cjistiel al pues jessi insiorât se al è in contat cul teritori.

Roberto Molinaro, cui miôr di lui, al à fat la storie dai passaçs burocratics pe ricostruzion dal Cjistiel di Colorêt. Molinaro al è stât prime sindic dal paîs e dopo tal consei regjonâl, di dulà che a rivin i bêçs par tirâ sù di gnûf i bens culturai sdrumâts dal Orcolat. “Culì tal Comun di Colorêt – al à contât Molinaro – o vin trê cjistiei, oltri a Colorêt, e je la Torate di Mels e chel di Cjaurià, dopo dal revoc e dal taramot dal 1511, al è rivât Giovanni da Udine a piturâ i siei frescs”.

Il public in sale tal Centri polifunzionâl di Mels cuant che al è rivât il soreli

Prime dal taramot il Cjistiel di Colorêt al veve 48 mil metris cubis di stanziis. La proprietât e jere di 14 parons cun 27 unitât abitativis. “E je stade une storie lungje e complicade – al à disleât Molinaro – tirâlu sù di gnûf cu la spese di 28,4 milions di euros spindûts dai ents publics e il futûr cuâl isal?”. Stant a Molinaro la part publiche de gnove struture a varès di jessi pal Museu, pes mostris e pes cunvignis. “Soredut chi – al à concludût – o pensi che à di vignî la sede de Agjenzie pes lenghis europeanis”.

Enos Costantini, cul so spirt particolâr e in marilenghe, al à memoreât il pitôr Otto D’Angelo, muart di pôc e che al stave a Colorêt. Ancje Giovanni Serafini, par talian, al à dedicât cualchi peraule a D’Angelo, testemoni de vite furlane dai agns Trente.

Il sindic Luca Ovan al à tacât il so discors in marilenghe

Pier Mauro Zanin, president dal Consei Regjonâl dal Friûl Vignesie Julie, par talian, si è fermât a notâ la colaborazion de Societât Filologjiche Furlane cu la Regjon. Secont Zanin, la Filologjiche e je tant che un monument plen di valôrs. Il salût de Zonte regjonâl e dal president Massimiliano Fedriga al è stât puartât, par talian di Graziano Pizzimenti, assessôr aes infrastruturis e teritori.

La relazion uficiâl e je stade fate dal professôr Federico Vicario, president de Societât Filologjiche Furlane. Carlo Venuti, vice president de socie, al à presentât il Numar Unic pal congrès. Al è in libri cun 61 autôrs, fat di 876 pagjinis, dutis su Colorêt. Dentri si cjate gjeografie, archeologjie, storie, leterature, art, musiche, economie, tradizions, personaçs e tantis fotografiis di une volte e di cumò dal paîs. Cualchidun al à dit che e je tant che une enciclopedie di Colorêt.

Pier Mauro Zanin, president dal Consei Regjonâl dal Friûl Vignesie Julie, al ciacare par talian

Petro Fontanini, sindic di Udin, al à cjapât la consegne pal prossim congrès che al sarà fat inte “capitâl dal Friûl, intun moment indulà che a son manovris par distacâ Gurize dal Friûl e di zontâle a Triest”. Dopo i socis a si son puartâts in glesie pal conciert.

Pieri Fontanini, pocjis peraulis, curtis e che a si tocjin e in marilenghe:  ûs spietin a Udin il prossim an

Il conciert in glesie a Colorêt

Ator di misdì e mieç al à tacât il conciert inte glesie dai Sants Andree e Matie. Di Wolfgang Amadeus Mozart si è scoltât il conciert n. 4 in re maiôr FV 218 par violin e orchestre: allegro / andante cantabile / rondeau. L’esibizion e je stade de Amadeus Adriatic Orchestra, screade tal 2015 jenfri de Associazion Mozart Italia, te sede di Triest. Il conciert n. 4 al è stât fat di Mozart a disenûf agns cuant che al jere aes dipendencis dal Princip – Arcivescul Hieronymus von Colloredo. Al violin solist e à sunât une sflandorose Dragana Gajic.  La Amadeus Adriatic Orchestra e je fate di zovins musiciscj diplomâts o students dai Conservatoris di Triest e di Udin.

La Amadeus Adriatic Orchestra

Dopo de musiche di Mozart

Il bon gustâ in compagnie si è tignût li dal ristorant “Da Vico” di Cjaurià, par passe 178 di lôr cun salam, persut, macarons a lis urtiis, risot cul speck e cul puar, cjar cu lis patatis e lis verduris frescjis e la torte di sest.

Dopo di gustât, tacant a lis cuatri e par ogni mieze ore, a si fasevin lis visitis ae scuvierte dal Cjistiel di Colorêt, storie e cantîr. Note in bande, si scrîf ancje: Cjastiel.

Aes 18,30 inte Glesie parochiâl dai Sants Andree e Matie e je stade Messe grande celebrade di pre Daniele Calligaris cul acompagnament dai grups corâi di Cjaurià, direzût dal mestri Alessandra Bertoldi e di Colorêt Lauçane, cul mestri Velda De Narda.

Apontament pal 2019, cul 96in congrès, a Udin, capitâl dal Friûl e ancje a Gurize, dulà che la socie e je nassude tal 1919.

--

Servizi gjornalistic, fotografic e di butâ dentri in Internet ("networking") par cure di Elio Varutti e di Sebastiano Pio Zucchiatti. Altris fotografiis a son dal Archivi de Societât Filologjiche Furlane, come che al è scrit.

--

Par cui che al à voie di viodi dute la relazion dal president Federico Vicario: FRACAIT CULÌ.

--

Rassegne stampe

- Valter Tomada, “Zanin alla Filologica: La scelta delle Uti ha spolpato il Friuli. Ora lo ricostruiremo”, «Messaggero Veneto», 8 ottobre 2018.

Presentade la Setemane de culture furlane a Udin, li de Filologjiche

 La presentazion e je scomençade cuntun minût di riflession pe muart di Angela Felice, passionade di teatri furlan e de leterature cun in prin Pier Paolo Pasolini. Al è stât il professôr Federico Vicario, president de Societât Filologjiche Furlane a domandâ une meditazion di corot par jê ae presentazion de Setemane de Culture furlane. La riunion si je davuelzude inte sede de Filologjiche in Vie Manin a Udin. Vicario al à cjacarât sedi in marilenghe che par talian.

Udin, sede de Filologjiche - Giuseppe Morandini, Federico Vicario e Alessandra Piani tal minût di riflession pe muart di Angela Felice

Tal salon di onôr “Guglielmo Pelizzo” oltri che i gjornaliscj a ere presint une vore di int, come che al à dit Vicario “culì a son tancj di chei che a fasaran la Setemane de culture furlane”. Dopo al à nomenât dome cualchi iniziative, tant chês pai frutin, o chês di teatri o di musiche.

Gina Marpillero, Antonio Comelli, Alviero Negro, Alfeo Mizzau, Fabio Asquini, il Card. Celso Costantini, Fermo Solari, Pierluigi Cappello e altris furlans impuartants a saran memoreâts inte Setemane. Si doprarin ancje de Universitât furlane che e fâs 40 agns, invezit la riviste “La panarie” e à fat lis 50 primeveris e a son 40 agns che e je stade fondade  la associazion “La Bassa”.

Impuartant par Vicario, a son lis colaborazions metudis adun dal grup de “Setemane de Culture furlan” cun i apontaments di culture di “Vicino / Lontano” di Udin e di “èStoria” di Gurize. Il president al mostrave i numars di cheste iniziative rivade ae cuinte edizion, cul jutori di Alessandra Piani, al computer par fâ viodi lis fotografiis tal  linzûl.

Udin, presentazion de Setemane de culture furlane, Fedrico Vicario e Lionello D'Agostini, in pîts

Dopo al à fevelât, par talian, Giuseppe Morandini, president de Fondazion Friûl. Al à memoreât la convenzion fate de Fondazion cu la Societât Filologjiche Furlane pe pupilance de identitât e de lenghe furlane. Al si è dit content di fâ la strade su chest teme insiemi ae Filologjiche, une socie che e sa zontâ simpri gnovis tal cjamp de formazion e de culture di chenti. 

Dopo al à fevelât Davide Lorigliola, par mostrâ cemût che al funzione il sît Internet vierzût a pueste pe Setemane de culture furlane. Il recipient digjitâl dal web al devente ancje un archivi e al è stât indreçât ancje par il telefonut “smartphone” e par la taulute “tablet”. Il sît Internet propit al si clame: www.setemane.it

Al è stât invidât a fevelâ ancje Lionello D’Agostini, za president de Fondazion CRUP. Tra lis variis iniziativis de Setemane al à contât, par talian, D’Agostini, si è prontade une cunvigne dal titul “La rivoluzione dell’agricoltura friulana, da Antonio Comelli al futuro” par sabide ai 19 di Mai a lis 9 di matine, li dal auditori dal Istitût Professionâl pe Agriculture “S. Sabbatini” di Puçui. Cussì e sarà la ocasion di memoreâsi dal president de Ricostruzion, come che al ven clamât Comelli. Lui al à ben operât tant che president de Zonte regjonâl, dopo dal taramot dal 1976 par tirâ fûr il Friûl dal disastri. Al è stât un om cui principis clârs di etiche e di politiche.

L’ultin che al à cjacarât al è stât Enrico Tavano, vice president de Filarmoniche di Puçui, che pues svantâsi di vê 154 agns di ativitât. La Filarmoniche e fâs il conciert finâl de Setemane, ai 20 di Mai 2018, al teatri “Luigi Garzoni” di Tresesin a lis vot e trê cuarts di sere.

Al fevele Giuseppe Morandini, de Fondazione Friuli

--

Servizi gjornalistic, fotografic e di Networking par cure di Sebastiano Pio Zucchiatti e Elio Varutti, se nol è scrit intune altre maniere.

--

Il tabelon dai apontaments...

Identitât e i politics di vuê. Assemblee de Societât Filologjiche Furlane 2018, Udin

Gnûf parlament di Rome e identitât furlane, chest al è il cantin burît fûr dal professôr Federico Vicario, president de Societât Filologjiche Furlane. Lu à fat inte assemblee dal sodalizi ai 1ⁿ di Març dal 2018. “Il Parlament talian al varès di vê un bon voli ae valorizazion de apartignince teritoriâl e une atenzion particolâr al mont de culture e de scuele” – chest in struc al è il pinsîr di Vicario.

Di çampe: Federico Pirone, Gianni Torrenti, Mario Pittoni e Lorenzo Pelizzo ae assemblee de Societât Filologjiche Furlane dal 2018

Al à contât ancje di une Filologjiche simpri plui digjitâl, stant il fat che a son simpri di plui lis relazions metudis adun cun Internet, cun Facebook, dulà che la pagjine de Filologjiche e à vût 5.380 clicadis di “Mi plâs”, cuntune visualizazion medie di ogni messaç cun 1.100 utents e cul messaç plui let di 4.451 visitadôrs.

Une batude e je stade fate ancje cuintri di Udin. “Ce fasial la citât par meretâsi la definizion di capitâl dal Friûl – al si è domandât Vicario – parcè che nol è mighe un dirit sore di nuie”.

A scoltâlu, in prime file, a erin i politics di chenti e tancj sociis de Filologjiche, une associazion, cun plui di 3.000 iscrits che a vivin pal plui in regjon, ma ancje vie pe Italie e tal forest. La assemblee pardabon è à votât il belanç consuntîf pal 2017, cence contrariis, e chel preventîf pal 2018, jenfri di un plan trienâl che a saran a disposizion tal sît Internet de socie, oltri che inte sedis sociâl di Udin, Pordenon e Gurize.

Il salon d’onôr “Pelizzo” dal Palaç Mantica di vie Manin a Udin, sede de Societât Filologjiche Furlane, al jere plen di socis par decidi su lis ativitâts dal sodalizi, nassût tal 1919 a Gurize. Siche duncje cul Comun di Udin e cun lis altris istituzions si pense al centenari de socie.

Vicario al à fat une relazion pal 2017 dute pontade su cetantis ativitâts metudis adun, simpri plui impuartantis, cun tante int e simpri di plui cun lis istituzions dal teritori, a dimostrazion che “la Societât Filologjiche e le la cjase de culture furlane". Dopo, tant che une litanie civîl, al à tacât a contâ ce che al è stât fat.

La Filologjiche tal 2017, dopo la assemblee ordenarie dai socis e à prontât la cuarte edizion de Setemane de Culture Furlane, dai 4 ai 14 di Mai dal 2017. Si fevele di 120 apontaments sparniçâts par ogni bande dal Friûl storic cun 42 conferencis e cunvignis, 16 mostris e visitis vuidadis, 11 spetacui e concierts e, nuie mancul, che 40 ocasions di gjoldi pai fruts, ancje tes bibliotechis dai paîs. A son stadis plui di cent manifestazions tai cjâf lûcs e in diviersis localitâts des provinciis di Udin, Pordenon, Gurize e ancje Belum, Trevîs e Vignesie, cjapant dentri lis comunitâts e lis associazions locâls, studiôs e apassionâts cultôrs di storie, tradizions, lenghe e leterature, art e musiche furlane.

Feliciano Medeot, tal ordenadôr, Federico Vicario e Carlo Del Torre

La Setemane de culture furlane e je stade patrocinade dal Ministeri dai Bens e des Ativitâts Culturâls e dal Turisim, de Regjon Friûl Vignesie Julie e dal Consei Regjonâl, di Turismo FVG, des provinciis e dai comuns interessâts, des Arcidiocesis di Udin e Gurize e de Diocesi di Concuardie-Pordenon, des bancjis di Credit Cooperatîf dal Friûl e des Fondazions Friuli e CARIGO. A àn colaborât 77 associazions culturâls, 16 plêfs e parochiis, 10 grups corâi e associazions musicâi, 7 museus, 8 Proloco e UTE, e 50 scuelis e istitûts comprensîfs. La prossime e cuinte edizion si tignarà dai 10 ai 20 di Mai dal 2018.

Dopo e je stade fate la Fraie de Vierte a Sedean ai 14 di Mai e il XCIV Congrès, ai 24 di Setembar, in chel di Mueç, cuntun sucès dal numar unic stampât pe ocasion cu lis firmis di Giuliana Pugnetti e Bruno Lucci.

Il sucès plui sflandorôs, pe Societât Filologjiche Furlane al è dât dai 497 iscrits ai Cors pratics di lenghe e culture furlane. Il 70 par cent e passe di lôr a son rivâts insom. Culì a àn insegnât 18 mestris in 22 localitâts: Cjampfuarmit, Cjarlins, Çarvignan, Cividât, Codroip, Colorêt di Montalban, Damâr, Flaiban - Merêt di Tombe – Sedean, Gurize, Manià, Mortean, Mueç,  Reane dal Rojâl, Romans dal Lusinç, Ruvigne, San Vît dal Tiliment, Sopule, Spilimberc, Tavagnà, Udin e Voleson Darzin (in Friûl Vignesie Julie).

Une altre biele ativitât e je chê dal servizi di gjestion dal Sportel Linguistic di Palme, San Zorç di Noiâr, San Zuan dal Nadison (in Friûl Vignesie Julie) e San Michel dal Tiliment (te regjon Venit). Tantis a son lis domandis par voltâ i tescj dal talian al furlan, oltri ae consulence, traduzion e revision de grafie.

No si à di dismenteâ il progjet Eduka 2 “Par un guvier transfrontalîr de istruzion”, inviât dal 1n di Setembar 2017, dentri dal program Interreg V-A Italie-Slovenie. E dopo al à vût sucès il seminari di aprofondiment su la Vuere Grande in Friûl Vignesie Julie, cun Laboratoris didatics intai Istitûts Comprensîfs e la publicazion di un fassicul.

Altris manifestazions che a meritin: la Fieste de Patrie dal Friûl, Marilenghe & Mariscuele a Codroip, la rassegne “Vicino / Lontano” di Udin, i Savôrs cun lis Pro Loco a Passarian, èStoria di Gurize, Friuli Doc a Udin, il Premi San Simon di Codroip e Leggimontagna di Tumieç.

Cinc a son i concors e premis de Filologjiche: il Premi Ciceri, XVIII edizion; il concors pe traduzion in marilenghe dal grêc e dal latin, XV edizion; il concors “Lenghis”, VII edizion; chel dedicât a Chino Ermacora, III edizion e l’ultin che al à par titul: “Presepis inte scuele dal Friûl Vignesie Julie”, XII edizion.

Dopo lis publicazions: dal periodic Ce Fastu? Ai cuatri numars di Sot la Nape, al Strolic e il Lunari, fin al boletin Scuele Furlane.

Pe publicazions fatis a coventaressin tantis pagjinis… tacant cul Diari di Olmis, o viodint “Pier Paolo Pasolini nelle parole di Giuseppe Marchetti”, ristampe anastatiche gjavade di Risultive 31, fin al libri sui “Oronimi del Friuli” di Barbara Cinausero Hofer e Ermano Dentesano e vie discorint. Baste viodilis tal sît Internet de Societât.

Il sît Internet de socie, in dôs versions linguistichis (talian e furlan) al à vût 22 mil e 962 visitadôrs de Italie e di altris 99 dai paîs forescj. Lis pagjinis viodudis a son stadis 121 mil e 169. Lis gnovis dal grup par Internet, o cemût che si dîs la “Newsletter” e à vût 55 numars di spedizion digjitâl in 2.436 direzion di pueste eletroniche. Nuie mâl par une clape di 3 mil sociis.

E cetantis altris robis. E cetantis intervents ancje impeverâts, dopo chel che nus à dit il president, Federico Vicario, cu la poie dal tesorîr Carlo Del Torre e dal diretôr Feliciano Medeot.

I politics che a àn tabaiât dopo di Vicario a son ducj intervignûts par talian, cui murmui dai sociis, che a àn gust di scoltâ dut il cjacarâ in marilenghe. Al à tacât Federico Pirone, assessôr ae Culture dal Comun di Udin, memoreant il jutori dal so ent pal centenari de Filologjiche. Dopo al à dit alc sul sisteme des 25 bibliotechis dal dulintor di Udin par vie che al si clamarà “Sisteme des bibliotechis dal Friûl”. Al à ancje fevelât des trasmissions par furlan dentri de RAI.

Gianni Torrenti, assessôr ae Culture de Regjon Autonome Friûl Vignesie Julie – che e da la plui part dai contribûts al sodalizi – al si è complimentât pes ativitâts. Ancje lui al à dit alc su la convenzion cu la RAI pes trasmissions par furlan e al à criticât la Universitât di Udin parcè che no fâs masse a pro de marilenghe.

Mario Pittoni, senatôr fresc di elezion pal partît de “Lega”, al à memoreât il salvament fat e Universitât furlane daspò de crisi dal 2008. Dopo al à batût sul fat di tornâ a vê un Diretôr scolastic regjonâl, se il so partît al fasarà il guvier.

La plui sclete gnove di cheste assemblee, par gno cont, e je rivade dai intervents des dipendents feminis de struture. Katia Bertoni, bibliotecarie de Filologjiche, e à mostrât cemût che si à di fâ par cirî tal sît web dal sodalizi un articul digjitalizât, stant la incressite dal servizi di “document delivery” (staie a dî propit il mût di lei un test cul ordenadôr o computer tacât a Internet). A son stadis 12 mil e 439 lis domandis di chest tip di servizi, il dopli dal an passât.

Antonella Ottogalli e à tabaiât dai progjets specifics dal Centri di documentazion, ricercje e sperimentazion didatiche pe scuele furlane (a pene screât, ma za un lusorôs di vite formative) cun lis centenârs di iscrizion di mestris e di insegnants a lis iniziativis comprendude la Scuele di Avost a Aplis di Davâr cuntun centenâr di educadôrs. Al è stât presentât il gnûf sît di scuele furlane, clamât propit: scuelefurlane.it

Alessandra Piani è à contât dute la schirie di ents e grups di culture che a fasaran la Setemane de culture furlane tal mês di Mai dal 2018, dulà che a saran proviodûts events ancje in colaborazion cui Fogolârs Furlans di Milan e di Rome.

Cumò vonde. Si viodarìn a Budoie e a Colorêt. Propit ai 20 di Mai al è un altri apontament dal sodalizi, la Fraie de Vierte a Budoie e al 1ⁿ di Otubar dal 2018 il XCV congrès sociâl a Colorêt.

La bibliotecarie Katia Bertoni e mostre, cuntun tic di snait, un test furlan tirât su in Internet dal sît dal sodalizi

Antonella Ottogalli e dislpee la scree dal Centri di documentazion, ricercje e sperimentazion didatiche pe scuele furlane

Alessandra Piani cul simbul de Setemane de culture furlane prontade pal Mai dal 2018

Riferiments par sgarfâ tal web

- Fabiana Dalla Valle, L'attacco della Filologica: “Udine fa di tutto per essere meno friulana di quello che è”, «Messaggero Veneto» dai 12 di Març dal 2018.

- Federico Vicario, Assemblee 2018, la relazion morâl dal President, tal web dai 12 di Març dal 2018.

- Elio Varutti, Assemblee de Societât Filologjiche Furlane 2017, Udin, tal web dai 8 di Març dal 2017.

- E. Varutti, La Setemane de Culture Furlane in Friûl, IV edizion, tal web dai 27 di Avrîl dal 2017.

--

Servizi gjornalistic, fotografic e di networking par cure di Elio Varutti. Ricercjis tal web cun la colaborazion di Sebastiano Pio Zucchiatti.

Gnûf libri sul teatri furlan di Bepi Agostinis presentât in Provincie di Udin

Cul titul “Storie e cronistorie dal Teatri in Friûl dal 1300 al 2000” al è saltât fûr, tal Fevrâr dal 2018, l’ultin libri di Bepi Agostinis. Al è dut scrit in marilenghe. 

Federico Vicario, Federico Pirone, Pietro Fontanini, Bepi Agostinis, Angela Felice e Lorenzo Fabbro

E à dit ben Angela Felice, vie di lunc de presentazion, che al è il risultât da la “passion di une vite”. Bepi Agostinis, om di teatri, al à fat chest libri, oltri che cuntun snait dut particolâr, ancje tant che un scritôr plen di passion pal teatri furlan.

Al è stât presentât in public tal Salon dal Palaç Belgrât, li de Provincie di Udin, in place dal Patriarcjât, ai 27 di Fevrâr dal 2018, cuntune vore di int. Il prin a fevelâ di chest libri al è stât Pietro Fontanini, president de Provincie di Udin. “O sin un popul cence un teatri stabil – al à dit Fontanini – nô o sin maiorance, ma nuie teatri stabil, invezit i slovens, che a son une piçule minorance, a àn il teatri stabil, jo o crôt che bisugnarès intervignî ator de lenghe furlane, cuintri la prepotence de Regjon”.

Fontanini al à zontât che al “vignarà il timp di vê un teatri stabil in lenghe furlane come te bataie di Bepi Agostinis, che tal 2006 al veve puartât in Regjon 4 mil e 500 firmis parcè che il Friûl al vedi il so Teatri Stabil”. Cuntune ponte di marum Fontanini al à sierât il so discori cussì: “Nô furlans o vin di ospitâ lis compagniis di teatri che a vegnin di fûr, o vin di cjalâ e di bati lis mans, ma no podin produsi teatri”.

Federico Vicario, president de Societât Filologjiche Furlane, che al fevelave ancje in non de Fondazion Friûl, vuidade di Giuseppe Morandini, al à notât il lavôr di cualitât fat di Agostinis. “Culì o vin une storie lungje e popolâr cun tantis espressions di teatri. Pensin ae Associazion Teatrâl Furlane, cui siei 40 agns di vite e cetantis compagniis metudis adun, fatis lis sumis o vin di meti tal l’ordin dal dì la cuistion dal teatri stabil furlan”.

Daspò al à vût la peraule Federico Pirone, assessôr ae Culture dal Comun di Udin, che al à let un intervent in marilenghe. Sul teme dal teatri furlan al à dit che “Bepi Agostinis nus torne a clamâ aes passion fuartis e profondis”. Pirone al à dit ancje alc su la “Bataie pe dignitât di une lenghe e je une bataie umile e determinade, estrose e apassionade, e je une bataie che e à un spessôr di un moviment dal bas, intim, popolâr, une bataie che o condividin”.

Lorenzo Fabbro, president de Agjenzie Regjonâl pe Lenghe Furlane (ARLeF), al à ringraciât Pirone che “al à let il so intervent par furlan, che e je une lenghe di doprâ in ducj i cjamps e par dutis lis ocasions”. Dopo al à fat lis laudis a Bepi Agostinis, grant espert di teatri che si è formât te Academie di Art Dramatiche di Udin propit cul so fondadôr Nico Pepe.

L’intervent plui plen di morbin al è stât chel di Angela Felice, une altre passionade di teatri e che cul teatri e à vût simpri a ce fâ. “Chest libri al à un grant valôr – e à dit la professore Felice – al mostre a ducj nô il sisteme dal teatri furlan, vignût in ca dal Votcent, dopo dal Risorziment, il sisteme al è fat di nons, lûcs, autôrs, atôrs, regjiscj, di salis di teatri e di int di teatri, tecnics dai lusôrs, dai microfonuçs e vie indevant”.

Il libri al à 480 pagjinis e une vore di fotografiis. Clâr che il spazi plui fuart (300 pagjinis) al è dedicât al teatri dal Nûfcent in Friûl, parcè che Bepi al à metût dentri ducj i nons dai atôrs che al è rivât a tirâ dongje, cun dutis i spetacui imbastîts in Cjargne, te Basse furlane e in cetantis bandis dal Friûl. Brao Bepi, tu âs fat propri un biel lavôr!

--

Fotografiis, articul e networking par cure di Elio Varutti, cul jutori di Girolamo Jacobson.
--

Riferiments tal web

- Al Friuli il teatro stabile in marilenghe”. L’appello alla presentazione del libro sulla storia del teatro di Bepi Agostinis, on-line dai 27 di Fevrâr dal 2018.

La Setemane de Culture Furlane in Friûl, IV edizion

Federico Vicario, president de Societât Filologjiche Furlane al à presentât lunis ai 24 di Avrîl dal 2017, la Setemane de Culture Furlane pal 2017. 

Sergio Bolzonello e Federico Vicario

La presentazion e si je davuelzude inte sale P.P. Pasolini dal Palaç de Regjon in Via Sabbadini a Udin cun lis autoritâts e cetancj gjornaliscj.

«O vin prontade une Setemane de Culture Furlane – al à dit Vicario – dai 4 ai 14 di Mai, cun 130 ents, parochiis, scuelis, Pro loco e teatri». I comuns metûts adun a son plui di 70 des provinciis dal Friûl Vignesie Julie e, plui in là, cun Trevîs, Belum e Vignesie. 

Il patrocini dal Ministeri pai Bens Culturai al è il plui sflandorôs, ma ancje chel de Regjon nol è nuie mâl o chel di Turismo-fvg. Po dopo a àn aderît ancje dôs arcidiocesi (Udin e Gurize) e une diocesi (Concuardie e Pordenon), une vore di glesiis, piçui grups culturâi, cooperativis, Fogolârs Furlans, grups folcloristics, universitâts de tierce etât e bibliotechis a manete.

Franco Iacop, Sergio Bolzonello, Federico Vicario e Renzo Medeossi

«Fasarìn culture – al à dit Vicario, che al à fevelât sedi in marilenghe, sedi pat talian  – memoreant i plui lustrissim protagoniscj de lenghe, de storie e de leterature di chenti in 120 apontaments sparniçâts da par dut». Il program dai events al è penç. Al proviôt di cjacarâ de Vuere Grande, di leterature furlane, di art, dai cjants, di vins e di libris di lei insiemi cui zovins. O scoltarin discori di pre Toni Beline, Pietro Zorutti, pre Meni Zanier, Maria Tore Barbina, Gilberto Pressacco, tant par fâ cualchi non de Furlanie. 

Al è rivât ancje il sosten des Fondazion (chê dal Friûl e de CARIGO) e di vot bancjis di credit cooperatîf. La ultime zornade si sierarà cul conciert dal Coro Zovanîl Regjonâl dal Friûl Vignesie Julie, organizât in colaborazion cul USCI FVG, intal Domo di Codroip aes 8 e mieze di sere.

Il president dal Consei Regjonâl, Franco Iacop al à fevelât, par furlan, di «une iniziative cussì impuartante e di riferiment pe culture furlane in patrie e ancje di fûr dal nestri teritori».

Di une setemane di grande culture cuntun voli ae economie e ae identitât al à cjacarât Renzo Medeossi, vice president pal Gurizan de Societât Filologjiche Furlane. Lui al è intervignût ancje in non de Federazion Regjonâl des bancjis di credit cooperatîf e tant che president de Cjasse Rurâl di Lucinîs, Fare e Caprive.

«Cheste e je une setemane di culture par sintîsi plui furlans e par fâ une riflession sul teme de identitât che al somee un tic smamît – al à dit in lenghe taliane Sergio Bolzonello, assessôr ae Ativitâts Produtivis, Turisim e Cooperazion de Regjon – alore o vin di cuinçâ il sintiment di apartignince cun la viertidure al gnûf».

Dopo al è intervignût ancje Enos Costantini par fevelâ des etichetis des butiliis dal vin. «Chei blecs di cjarte par fâ biel il vin – al à dit – al è il titul de mostre di etichetis artistichis pes butiliis di vin che si viodarà a a Cuar di Rosacis, cun pituris di Otto D’Angelo, Guido Tavagnacco, Alessandro Bimbatti, Jacovitti, Caucigh e Darko».

La setemane e scomence cu la presentazion di Olmis, il diari bilengâl pe scuele primarie e secondarie di prin grât. L’event al sarà te Fondazion Friûl a Udin, in Vie Manin ai 4 di Mai a lis cinc sore sere. Chest librut di scuele al è rivât a 20 mil copiis dadis fûr pai istitûts comprensîf di chenti.

Jenfri la setemane si davuelzarâ ancje la Fraie de Vierte a Sedean. Il calendari complet de Setemane de Culture Furlane e i programs di ogni iniziative si puedin viodi sul sît Internet www.scf2017.it là che gracie aes funzions di gjeolocalizazion si pues viodi ancje la cjartine cu lis sedis dai events e i percors di fâ par rivâ, come che al à mostrât cul computer Davide Lorigliola a une sale plene di int interessade.

Federico Vicario, president de Societât Filologjiche Furlane

---

Servizi gjornalistic, fotografic e di networking par cure di Elio Varutti