Identitât e i politics di vuê. Assemblee de Societât Filologjiche Furlane 2018, Udin

Gnûf parlament di Rome e identitât furlane, chest al è il cantin burît fûr dal professôr Federico Vicario, president de Societât Filologjiche Furlane. Lu à fat inte assemblee dal sodalizi ai 1ⁿ di Març dal 2018. “Il Parlament talian al varès di vê un bon voli ae valorizazion de apartignince teritoriâl e une atenzion particolâr al mont de culture e de scuele” – chest in struc al è il pinsîr di Vicario.

Di çampe: Federico Pirone, Gianni Torrenti, Mario Pittoni e Lorenzo Pelizzo ae assemblee de Societât Filologjiche Furlane dal 2018

Al à contât ancje di une Filologjiche simpri plui digjitâl, stant il fat che a son simpri di plui lis relazions metudis adun cun Internet, cun Facebook, dulà che la pagjine de Filologjiche e à vût 5.380 clicadis di “Mi plâs”, cuntune visualizazion medie di ogni messaç cun 1.100 utents e cul messaç plui let di 4.451 visitadôrs.

Une batude e je stade fate ancje cuintri di Udin. “Ce fasial la citât par meretâsi la definizion di capitâl dal Friûl – al si è domandât Vicario – parcè che nol è mighe un dirit sore di nuie”.

A scoltâlu, in prime file, a erin i politics di chenti e tancj sociis de Filologjiche, une associazion, cun plui di 3.000 iscrits che a vivin pal plui in regjon, ma ancje vie pe Italie e tal forest. La assemblee pardabon è à votât il belanç consuntîf pal 2017, cence contrariis, e chel preventîf pal 2018, jenfri di un plan trienâl che a saran a disposizion tal sît Internet de socie, oltri che inte sedis sociâl di Udin, Pordenon e Gurize.

Il salon d’onôr “Pelizzo” dal Palaç Mantica di vie Manin a Udin, sede de Societât Filologjiche Furlane, al jere plen di socis par decidi su lis ativitâts dal sodalizi, nassût tal 1919 a Gurize. Siche duncje cul Comun di Udin e cun lis altris istituzions si pense al centenari de socie.

Vicario al à fat une relazion pal 2017 dute pontade su cetantis ativitâts metudis adun, simpri plui impuartantis, cun tante int e simpri di plui cun lis istituzions dal teritori, a dimostrazion che “la Societât Filologjiche e le la cjase de culture furlane". Dopo, tant che une litanie civîl, al à tacât a contâ ce che al è stât fat.

La Filologjiche tal 2017, dopo la assemblee ordenarie dai socis e à prontât la cuarte edizion de Setemane de Culture Furlane, dai 4 ai 14 di Mai dal 2017. Si fevele di 120 apontaments sparniçâts par ogni bande dal Friûl storic cun 42 conferencis e cunvignis, 16 mostris e visitis vuidadis, 11 spetacui e concierts e, nuie mancul, che 40 ocasions di gjoldi pai fruts, ancje tes bibliotechis dai paîs. A son stadis plui di cent manifestazions tai cjâf lûcs e in diviersis localitâts des provinciis di Udin, Pordenon, Gurize e ancje Belum, Trevîs e Vignesie, cjapant dentri lis comunitâts e lis associazions locâls, studiôs e apassionâts cultôrs di storie, tradizions, lenghe e leterature, art e musiche furlane.

Feliciano Medeot, tal ordenadôr, Federico Vicario e Carlo Del Torre

La Setemane de culture furlane e je stade patrocinade dal Ministeri dai Bens e des Ativitâts Culturâls e dal Turisim, de Regjon Friûl Vignesie Julie e dal Consei Regjonâl, di Turismo FVG, des provinciis e dai comuns interessâts, des Arcidiocesis di Udin e Gurize e de Diocesi di Concuardie-Pordenon, des bancjis di Credit Cooperatîf dal Friûl e des Fondazions Friuli e CARIGO. A àn colaborât 77 associazions culturâls, 16 plêfs e parochiis, 10 grups corâi e associazions musicâi, 7 museus, 8 Proloco e UTE, e 50 scuelis e istitûts comprensîfs. La prossime e cuinte edizion si tignarà dai 10 ai 20 di Mai dal 2018.

Dopo e je stade fate la Fraie de Vierte a Sedean ai 14 di Mai e il XCIV Congrès, ai 24 di Setembar, in chel di Mueç, cuntun sucès dal numar unic stampât pe ocasion cu lis firmis di Giuliana Pugnetti e Bruno Lucci.

Il sucès plui sflandorôs, pe Societât Filologjiche Furlane al è dât dai 497 iscrits ai Cors pratics di lenghe e culture furlane. Il 70 par cent e passe di lôr a son rivâts insom. Culì a àn insegnât 18 mestris in 22 localitâts: Cjampfuarmit, Cjarlins, Çarvignan, Cividât, Codroip, Colorêt di Montalban, Damâr, Flaiban - Merêt di Tombe – Sedean, Gurize, Manià, Mortean, Mueç,  Reane dal Rojâl, Romans dal Lusinç, Ruvigne, San Vît dal Tiliment, Sopule, Spilimberc, Tavagnà, Udin e Voleson Darzin (in Friûl Vignesie Julie).

Une altre biele ativitât e je chê dal servizi di gjestion dal Sportel Linguistic di Palme, San Zorç di Noiâr, San Zuan dal Nadison (in Friûl Vignesie Julie) e San Michel dal Tiliment (te regjon Venit). Tantis a son lis domandis par voltâ i tescj dal talian al furlan, oltri ae consulence, traduzion e revision de grafie.

No si à di dismenteâ il progjet Eduka 2 “Par un guvier transfrontalîr de istruzion”, inviât dal 1n di Setembar 2017, dentri dal program Interreg V-A Italie-Slovenie. E dopo al à vût sucès il seminari di aprofondiment su la Vuere Grande in Friûl Vignesie Julie, cun Laboratoris didatics intai Istitûts Comprensîfs e la publicazion di un fassicul.

Altris manifestazions che a meritin: la Fieste de Patrie dal Friûl, Marilenghe & Mariscuele a Codroip, la rassegne “Vicino / Lontano” di Udin, i Savôrs cun lis Pro Loco a Passarian, èStoria di Gurize, Friuli Doc a Udin, il Premi San Simon di Codroip e Leggimontagna di Tumieç.

Cinc a son i concors e premis de Filologjiche: il Premi Ciceri, XVIII edizion; il concors pe traduzion in marilenghe dal grêc e dal latin, XV edizion; il concors “Lenghis”, VII edizion; chel dedicât a Chino Ermacora, III edizion e l’ultin che al à par titul: “Presepis inte scuele dal Friûl Vignesie Julie”, XII edizion.

Dopo lis publicazions: dal periodic Ce Fastu? Ai cuatri numars di Sot la Nape, al Strolic e il Lunari, fin al boletin Scuele Furlane.

Pe publicazions fatis a coventaressin tantis pagjinis… tacant cul Diari di Olmis, o viodint “Pier Paolo Pasolini nelle parole di Giuseppe Marchetti”, ristampe anastatiche gjavade di Risultive 31, fin al libri sui “Oronimi del Friuli” di Barbara Cinausero Hofer e Ermano Dentesano e vie discorint. Baste viodilis tal sît Internet de Societât.

Il sît Internet de socie, in dôs versions linguistichis (talian e furlan) al à vût 22 mil e 962 visitadôrs de Italie e di altris 99 dai paîs forescj. Lis pagjinis viodudis a son stadis 121 mil e 169. Lis gnovis dal grup par Internet, o cemût che si dîs la “Newsletter” e à vût 55 numars di spedizion digjitâl in 2.436 direzion di pueste eletroniche. Nuie mâl par une clape di 3 mil sociis.

E cetantis altris robis. E cetantis intervents ancje impeverâts, dopo chel che nus à dit il president, Federico Vicario, cu la poie dal tesorîr Carlo Del Torre e dal diretôr Feliciano Medeot.

I politics che a àn tabaiât dopo di Vicario a son ducj intervignûts par talian, cui murmui dai sociis, che a àn gust di scoltâ dut il cjacarâ in marilenghe. Al à tacât Federico Pirone, assessôr ae Culture dal Comun di Udin, memoreant il jutori dal so ent pal centenari de Filologjiche. Dopo al à dit alc sul sisteme des 25 bibliotechis dal dulintor di Udin par vie che al si clamarà “Sisteme des bibliotechis dal Friûl”. Al à ancje fevelât des trasmissions par furlan dentri de RAI.

Gianni Torrenti, assessôr ae Culture de Regjon Autonome Friûl Vignesie Julie – che e da la plui part dai contribûts al sodalizi – al si è complimentât pes ativitâts. Ancje lui al à dit alc su la convenzion cu la RAI pes trasmissions par furlan e al à criticât la Universitât di Udin parcè che no fâs masse a pro de marilenghe.

Mario Pittoni, senatôr fresc di elezion pal partît de “Lega”, al à memoreât il salvament fat e Universitât furlane daspò de crisi dal 2008. Dopo al à batût sul fat di tornâ a vê un Diretôr scolastic regjonâl, se il so partît al fasarà il guvier.

La plui sclete gnove di cheste assemblee, par gno cont, e je rivade dai intervents des dipendents feminis de struture. Katia Bertoni, bibliotecarie de Filologjiche, e à mostrât cemût che si à di fâ par cirî tal sît web dal sodalizi un articul digjitalizât, stant la incressite dal servizi di “document delivery” (staie a dî propit il mût di lei un test cul ordenadôr o computer tacât a Internet). A son stadis 12 mil e 439 lis domandis di chest tip di servizi, il dopli dal an passât.

Antonella Ottogalli e à tabaiât dai progjets specifics dal Centri di documentazion, ricercje e sperimentazion didatiche pe scuele furlane (a pene screât, ma za un lusorôs di vite formative) cun lis centenârs di iscrizion di mestris e di insegnants a lis iniziativis comprendude la Scuele di Avost a Aplis di Davâr cuntun centenâr di educadôrs. Al è stât presentât il gnûf sît di scuele furlane, clamât propit: scuelefurlane.it

Alessandra Piani è à contât dute la schirie di ents e grups di culture che a fasaran la Setemane de culture furlane tal mês di Mai dal 2018, dulà che a saran proviodûts events ancje in colaborazion cui Fogolârs Furlans di Milan e di Rome.

Cumò vonde. Si viodarìn a Budoie e a Colorêt. Propit ai 20 di Mai al è un altri apontament dal sodalizi, la Fraie de Vierte a Budoie e al 1ⁿ di Otubar dal 2018 il XCV congrès sociâl a Colorêt.

La bibliotecarie Katia Bertoni e mostre, cuntun tic di snait, un test furlan tirât su in Internet dal sît dal sodalizi

Antonella Ottogalli e dislpee la scree dal Centri di documentazion, ricercje e sperimentazion didatiche pe scuele furlane

Alessandra Piani cul simbul de Setemane de culture furlane prontade pal Mai dal 2018

Riferiments par sgarfâ tal web

- Fabiana Dalla Valle, L'attacco della Filologica: “Udine fa di tutto per essere meno friulana di quello che è”, «Messaggero Veneto» dai 12 di Març dal 2018.

- Federico Vicario, Assemblee 2018, la relazion morâl dal President, tal web dai 12 di Març dal 2018.

- Elio Varutti, Assemblee de Societât Filologjiche Furlane 2017, Udin, tal web dai 8 di Març dal 2017.

- E. Varutti, La Setemane de Culture Furlane in Friûl, IV edizion, tal web dai 27 di Avrîl dal 2017.

--

Servizi gjornalistic, fotografic e di networking par cure di Elio Varutti. Ricercjis tal web cun la colaborazion di Sebastiano Pio Zucchiatti.

Congrès a Mueç pe Societât Filologjiche Furlane pal 2017

Nol è facil di viodi une sale plene di int cu la bocje vierte in scolte dal relatôr e cence nissun a sgarfâ tal telefonut celulâr. Al è capitât a Giovanni Frau, professôr emerit de Universitât dal Friûl, tant che al fevelave di “Mueç, paîs di lenghe furlane cun non di origjine slave?”.

Di çampe: Diego Navarria e il sindic di Mueç Giorgio Filaferro. A drete: Sergio Bolzonello

Al è stât cussì clâr e brâf a displeâ che invezit il non di Mueç al ven dal latin “Modium”, che al jere une misure agrarie. Dopo la peraule e je passade dentri la antighe lenghe sclave e cussì al somee che Mueç e sedi di divignince di di la dal Lusinç. Mueç al è “Moggio Udinese” par talian.

Al jere un plasè viodi ducj atents: i sorestants in prime file, dongje di un grup di alpins cul cjapiel poiât su lis gjambis e daûr dute la int di Mueç e de Filologjiche, cun tancj di lôr in pîts, parcè che a erin finidis lis cjadreis. Sergio Bolzonello, vice president de Regjon Autonome Friûl Vignesie Julie, di tant che al jere interessât de lezion di Frau al cjapave note su un sfueut tant che un Remigjin tal prin dì di scuele. A dimostrazion che Frau cuant che al cjacare, ce tant che al è brâf, al cjape il cûr, prime che il cerviel.

Si è davuelzût cussì a Mueç il 94ⁱⁿ congrès de Societât Filologjiche Furlane, nassude a Gurize tal 1919. Si che duncje al si svicine il 100ⁱⁿ inovâl de socie.

Dut al è scomençât te Badie di San Gjal cu la Sante Messe in marilenghe di Bonsignôr Guido Genero, cul compagnament de Corâl di Sante Marie Maiôr di Spilimberc direzude dal mestri Ilvia Mulloni. La basiliche e jere sglonfe di int, cuntune coriere molade la fûr tal parc des machinis, di tante int che e jere vignude.

Bons. Guido Genero te Basiliche di Mueç

Aes 11, inte sale polifunzionâl “R. Treu” di Vie Rome, e à tacât il congrès cul salût dai sorestants. Al à cjacarât par prin Giorgio Filaferro, sindic di Mueç, un tic emozionât par saludâ lis autoritâts presints. «E je la prime volte che o feveli par furlan in un event public – al à dit il sindic – e mi visi che cuant che o jeri zovin o fevelavi in marilenghe e mi domandavin, par cjolimi intor: di dulà sêstu cun che fevelade?» Dopo al è intervignût Renato Valent, president de Pro Loco di Mueç, un grup che al à tant lavorât pe zornade dal congrès.

Adriano Lucci, president dal ent “Friuli nel Mondo”, nassût di une cueste de Societât Filologjiche Furlane, al à dit che la colaborazion tra i ents e à di jessi ancjemò plui fuarte.

La Corâl di Sante Marie Maiôr di Spilimberc direzude dal mestri Ilvia Mulloni

L’intervent centrâl al è stât la relazion dal professôr Federico Vicario, president de Societât Filologjiche Furlane. «E propri pensant ae unitât de comunitât furlane – al à dit Vicario – us dîs, prime di dut: biade l’ore! Sì, biade l’ore che il Senât al à votât la norme par fâ tornâ Sapade te sô regjon storiche e naturâl, valadî il Friûl – no sai se al è il câs di comentâ il fat che l’unic vôt cuintri a cheste risoluzion (rispiet ai 187 a pro e ai siet o vot astignûts, se mi visi ben) al è stât chel di un senadôr elet in Friûl (no dîs ch’al è “furlan”, parcè che no sal merte)».

«O saludi ancje altris rapresentants di istituzions furlanis – al à zontât Vicario – ch’a son chi cun nô, il President des Prolocos, Valter Pezzarini, il Delegât pe lenghe furlane de nestre Universitât, l’amì Enrico Peterlunger, il President dal ARLeF, Lorenzo Fabbro, il President de Assemblee de Comunitât lenghistiche furlane, Diego Navarria, dutis istituzions simpri dongje al nestri Istitût par ativâ colaborazions e inviâ progjets a pro de comunitât. Il discors de colaborazion cu la Fondazion Friûl al è impuartant, fondamentâl par nô. Us conti dome chest fat. Joibe e vinars – îr l’altri – o jeri jù a Triest pe cunvigne anuâl de Associazion dai Istitûts di culture d’Italie, l’AICI, la cunvigne “Italia è Cultura. La cultura e l’identità europea” inmaneade cu la poie dal Ministeri pai Bens culturâi e cul jutori de nestre Regjon – e chi o vin di ringraziâ l’Assessôr ae Culture Gianni Torrenti, che lu saludi ancje lui. In ocasion de Assemblee di cheste Associazion, ch’e conte passe cent istitûts e fondazions di culture in dute Italie, mi àn invidât a tignî une relazion di salût, par dâ il benvignût te nestre Regjon tant che President dal unic istitût associât, apont, a cheste organizazion». 

Di çampe: Giovanni Frau, Federico Vicario, Giorgio Filaferro, Bruno Lucci e Giuliana Pugnetti

Scoltant di Sapade che e à di tornâ tal Friûl, no i pareve vêr a Bolzonello che alore al à fevelât par tirâ dongje in Friûl i Comuns dal Mandament di Puart, che a jerin tal teritori dal Patriarcjât di Aquilee e dopo cu la Diocesi di Concuardie Pordenon. Sore di dut Bolzonello al à fevelât ben de “Setemane de Culture Furlane” prontade de Filologjiche cun cetancj grops, parochiis, scuelis, bibliotechis e ents locâi, ancje di fûr dal Friûl, par sclarî la impuartance de marilenghe e des lidrîs de nestre divignince cun 121 apontaments. In sale a erin ancje Franco Iacop, president dal Consei regjonâl e Gianni Torrenti, assessôr ae Culture de regjon. «Une biele patulie regjonâl» al à dit cualchidun.

A chest pont al è stât presentât il Numar Unic “Mueç” par cure di Giuliana Pugnetti e Bruno Lucci, un libri plen di gnovis sul paîs cussì dongje de Cjargne. Il libri al è stât une vore agradît dal public.

La sale sglonfe di int

Dopo si è passât a dâ il Premi “Andreina e Luigi Ciceri”, XVIII edizion, pal concors di scrits e materiâi multimediâi sui aspiets de culture e dal teritori dal Friûl. Inte sezion dai “Scrits” a son stâts premiâts Claudio Cotrufo, cul titul: “Materiali costruttivi nella pedemontana orientale nel Medioevo. L’utilizzo della pietra nelle valli del Grivò e del Malina”. Une premiade ancje di colôr di rose cun Annalisa Baldassi, cul titul: “Il quaderno d’imbreviature del notaio Giorgio Dell’Oste da Codroipo, 1370-1372. Studio ed edizione”.

Inte sezion “Materiâi multimediâi” a àn cjapât il premi Dorino Minigutti e Giorgio Cantoni cul lavôr dal titul: “Int/Art A la serie: musiche”.

Alpins in prime file

Il gustâ in compagnie si è tignût li dal ristorant “Al Kampo” e, stant che no erin plui puescj, ancje tal albierc ristorant “Al Leon Bianco”, par passe 170 di lôr.

Dopo di gustât, a lis cuatri a si fasevin lis visitis ae scuvierte dal teritori: 1) al complès abadial (Badie e Anticuarion). 2) Mostre “Mario Micossi. Opere a Moggio e dintorni” inte Tor medievâl. 3) Mostre “Moggio Udinese nella Grande Guerra. L’inattesa svolta 1917-1923”, li de viele scuele elementâr.

Apontament pal 2018, cul 95ⁱⁿ congrès, a Colorêt di Mont Alban!

Une schirie di sorestants. Tal mieç de foto: Sergio Bolzonello

---

Par cui che al à voie di viodi, in marilenghe, dute la relazion di Federico Vicario fracait culì.

---

Servizi gjornalistic, fotografic e di butâ dentri in Internet ("networking") par cure di Elio Varutti

L'intervent par talian di Sergio Bolzonello, sot dai voi di Giovanni Frau

Federico Vicario, Gianni Torrenti, assessôr ae Culture de regjon, e i premiâts "Ciceri 2017" Dorino Minigutti e Giorgio Cantoni

Chei dal Premi “Andreina e Luigi Ciceri” cun, a drete, Sergio Bolzonello: di çampe, Dorino Minigutti, Giorgio Cantoni, Annalisa Baldassi e Donatella Cozzi, president de Jurie

Federico Vicario intervistât de RAI regjonâl al congrès di Mueç

Mueç 2017 - Lis frutis de segretarie de Societât Filologjiche Furlane: di çampe, Elena De Sanctis, Alessandra Piani, Marilena Desio e Daniela Piva. In altris peraulis a son dome un toc dal "staff", cognossudis tant che "Lis Marilenis". Par esempli al mancje il Diretôr de Filologjiche, Feliciano Medeot e altris

La glesie sglonfe di int

Ducj cidins, che al fevele Giovanni Frau, clâr tant che la aghe

---

Rassegna stampa.

La Setemane de Culture Furlane in Friûl, IV edizion

Federico Vicario, president de Societât Filologjiche Furlane al à presentât lunis ai 24 di Avrîl dal 2017, la Setemane de Culture Furlane pal 2017. 

Sergio Bolzonello e Federico Vicario

La presentazion e si je davuelzude inte sale P.P. Pasolini dal Palaç de Regjon in Via Sabbadini a Udin cun lis autoritâts e cetancj gjornaliscj.

«O vin prontade une Setemane de Culture Furlane – al à dit Vicario – dai 4 ai 14 di Mai, cun 130 ents, parochiis, scuelis, Pro loco e teatri». I comuns metûts adun a son plui di 70 des provinciis dal Friûl Vignesie Julie e, plui in là, cun Trevîs, Belum e Vignesie. 

Il patrocini dal Ministeri pai Bens Culturai al è il plui sflandorôs, ma ancje chel de Regjon nol è nuie mâl o chel di Turismo-fvg. Po dopo a àn aderît ancje dôs arcidiocesi (Udin e Gurize) e une diocesi (Concuardie e Pordenon), une vore di glesiis, piçui grups culturâi, cooperativis, Fogolârs Furlans, grups folcloristics, universitâts de tierce etât e bibliotechis a manete.

Franco Iacop, Sergio Bolzonello, Federico Vicario e Renzo Medeossi

«Fasarìn culture – al à dit Vicario, che al à fevelât sedi in marilenghe, sedi pat talian  – memoreant i plui lustrissim protagoniscj de lenghe, de storie e de leterature di chenti in 120 apontaments sparniçâts da par dut». Il program dai events al è penç. Al proviôt di cjacarâ de Vuere Grande, di leterature furlane, di art, dai cjants, di vins e di libris di lei insiemi cui zovins. O scoltarin discori di pre Toni Beline, Pietro Zorutti, pre Meni Zanier, Maria Tore Barbina, Gilberto Pressacco, tant par fâ cualchi non de Furlanie. 

Al è rivât ancje il sosten des Fondazion (chê dal Friûl e de CARIGO) e di vot bancjis di credit cooperatîf. La ultime zornade si sierarà cul conciert dal Coro Zovanîl Regjonâl dal Friûl Vignesie Julie, organizât in colaborazion cul USCI FVG, intal Domo di Codroip aes 8 e mieze di sere.

Il president dal Consei Regjonâl, Franco Iacop al à fevelât, par furlan, di «une iniziative cussì impuartante e di riferiment pe culture furlane in patrie e ancje di fûr dal nestri teritori».

Di une setemane di grande culture cuntun voli ae economie e ae identitât al à cjacarât Renzo Medeossi, vice president pal Gurizan de Societât Filologjiche Furlane. Lui al è intervignût ancje in non de Federazion Regjonâl des bancjis di credit cooperatîf e tant che president de Cjasse Rurâl di Lucinîs, Fare e Caprive.

«Cheste e je une setemane di culture par sintîsi plui furlans e par fâ une riflession sul teme de identitât che al somee un tic smamît – al à dit in lenghe taliane Sergio Bolzonello, assessôr ae Ativitâts Produtivis, Turisim e Cooperazion de Regjon – alore o vin di cuinçâ il sintiment di apartignince cun la viertidure al gnûf».

Dopo al è intervignût ancje Enos Costantini par fevelâ des etichetis des butiliis dal vin. «Chei blecs di cjarte par fâ biel il vin – al à dit – al è il titul de mostre di etichetis artistichis pes butiliis di vin che si viodarà a a Cuar di Rosacis, cun pituris di Otto D’Angelo, Guido Tavagnacco, Alessandro Bimbatti, Jacovitti, Caucigh e Darko».

La setemane e scomence cu la presentazion di Olmis, il diari bilengâl pe scuele primarie e secondarie di prin grât. L’event al sarà te Fondazion Friûl a Udin, in Vie Manin ai 4 di Mai a lis cinc sore sere. Chest librut di scuele al è rivât a 20 mil copiis dadis fûr pai istitûts comprensîf di chenti.

Jenfri la setemane si davuelzarâ ancje la Fraie de Vierte a Sedean. Il calendari complet de Setemane de Culture Furlane e i programs di ogni iniziative si puedin viodi sul sît Internet www.scf2017.it là che gracie aes funzions di gjeolocalizazion si pues viodi ancje la cjartine cu lis sedis dai events e i percors di fâ par rivâ, come che al à mostrât cul computer Davide Lorigliola a une sale plene di int interessade.

Federico Vicario, president de Societât Filologjiche Furlane

---

Servizi gjornalistic, fotografic e di networking par cure di Elio Varutti

Assemblee de Societât Filologjiche Furlane 2017, Udin

Sapade in Friûl. Chest obietîf al è tornât a saltâ fûr inte assemblee de Societât Filologjiche Furlane ai 5 di Març dal 2017. 

Federico Vicario, president de Filologjiche

La mozion in chest sens e je stade aprovade ae unanimitât. Il Parlament talian al varès di finîle di blocâ cheste voie dai Sapadins di tornâ a jessi part dal Friûl. Al sarès dut a puest cu la burocrazie. A Sapade a àn fat e vinçût un referendum par passâ dal Venit in Friûl. Lis regjons a àn dât il bon acet. La regjon Friûl Vignesie Julie e à une specialitât e une identitât fuarte, tant che Sapade, paîs di montagne dongje For Davôtri e isule aloglote todescje, cuntun leam stret cul Friûl storic. Dome a Rome al è cualchi gnogno che nol capìs cheste realtât.

La assemblee è à votât il belanç consuntîf pal 2016 e il preventîf pal 2017, jenfri di un plan trienâl. Il salon d’onôr dal Palaç Mantica di vie Manin a Udin, sede de Societât Filologjiche Furlane, al jere plen di socis par decidi su lis ativitâts dal sodalizi, nassût tal 1919 a Gurize.

Il professôr Federico Vicario, president de Societât Filologjiche Furlane, al à fat une relazion pal 2016 dute vivarose par vie des ativitâts metudis adun, simpri plui bielis e simpri cun tante int e cun lis istituzions dal teritori.

Federico Vicario al fevele e Carlo Del Torre al è dongje

«La setemane passade – al à dit Vicario – o soi stât in Provincie di Udin a rapresentâ la nestre Societât Filologjiche ae cunvigne in memorie di Tiziano Tessitori e di Marzio Strassoldo. Jo o vevi il compit di introdusi la figure e l’opare di Tessitori, ch’al è stât par nûf agns President dal nestri Istitût (dal 1954 al 1963). Par preparâmi, o soi lât a leimi i discors di Tessitori ai Congrès o in altris ocasions uficiâls, Tessitori al timp al jere, naturalmentri, dut cjapât tra ministeris romans, istituzion de regjon autonome e altris fastidis. E Tessitori si domandave (e si dave ancje une rispueste, si capìs) ce ch’e veve di fâ la Filologjiche, il so compit, se dopo cuarante agns di vite no ves esauride la sô mission ideâl o cemût ch’e varès vût di tornâ a pensâle. Al è stât une vore interessant viodi cetant ch’al è gambiât il rapuart tra la Filologjiche e il teritori, par esempli, une Filologjiche ch’e veve une sô autoritât morâl ricognossude, in cuistions di culture e di tradizions furlanis, une Filologjiche ch’e podeve ancje permetisi di esprimi posizions politichis (e lu à fat plui voltis), une Filologjiche ch’e rivave a vê une partecipazion straordenarie de popolazion a lis sôs manifestazions sociâls (al baste dâ un cuc a lis fotografiis dai Congrès), une Filologjiche ch’e veve la fuarce di imponi un Ent Friûl tal Mont par ocupâsi dal grant probleme de emigrazion (e Tessitori, tra l’altri, al è stât il prin President dal Ent Friûl, dal 1953, l’an prime di assumi ancje la Presidence de Filologjiche)».

Feliciano Medeot... al sgarfe tal computer

Nol jere dut di colôr di rose. Al à continuât cussì Vicario: «Però. Però ancje in chê volte, si lei tai verbâi, i socios no paiavin lis cuotis cun regolaritât e – al diseve Tessitori – a costavin di plui di ce ch’a paiavin (tal sens che stampâ e mandâ lis rivistis, par pueste, al è simpri stât plui cjâr di ce che si domandave, e che si continue a domandâ, di cuote associative), ancje in chê volte si lamentavisi dai finanziaments che no bastavin, de biblioteche che no veve avonde spazi par cressi, dai comunicâts stampe che i gjornâi no cjapavin in considerazion, dai progjets che si inviavin e che no rivavin dapît. Però. Però la Societât Filologjiche e je une vore gambiade ancje jê, cul lâ dal timp, e je magari mancul fuarte politicamentri (ancje parcè che di Tessitori no ’nd è plui), ma une vore plui fuarte concretamentri, par fâ lis robis, par dâ rispuestis a la dibisugne di culture, di valôrs, di sens di comunitât che il Friûl al palese, une vore plui ative par jessi ogni dì sul nestri teritori, tes scuelis, sui gjornâi e in rêt, par colmâ il vueit di une identitât simpri plui lamie, smamide e scunide. O sin passât, si podarès dî, dal pensâ al fâ».

La Filologjiche tal 2016, dopo la assemblee dai socis e à prontât la tierce edizion de Setemane de Culture Furlane, dal 5 ai 15 di Mai. Cemût che a àn scrit, par ridi, i cunfradis Argjentins: «La setemane in Friûl e va indevant par dîs dis almancul!».

Dopo e je stade fate la Fraie de Vierte a Secuals ai 15 di Mai e il XCIII Congrès, ai 25 di Setembar, in chel di Martignà, cuntun sucès dal numar unic stampât pe ocasion. Altris manifestazions che a meritin: il ricuart di don Guido Maghet a 25 agns de muart a Cormons, ai 22 di Fevrâr. Dopo ai 10 di Març la cunvigne “Toponomastica e minoranze linguistiche”. Une altre cunvigne, ai 22 di Març, a San Vît dal Tiliment sui Vincj agns de leç regjonâl n. 12/96. Un incuintri, plen di mestris, al è stât inmaneât a Codroip ai 9 di Avrîl, cul titul: “Marilenghe & Mariscuele”. Une altre cunvigne cul titul: “Identitât e autonomie, dibatit sul Friûl di îr e di vuê”.

Cuatri a son i concors e premis de Filologjiche: il concors pe traduzion dal grêc e dal latin, XIV edizion; il concors “Lenghis”, VI edizion; chel dedicât a Chino Ermacora, II edizion e l’ultin che al à par titul: “Presepi nelle scuole del Friuli Venezia Giulia”, XII edizion. Dopo lis publicazions: dal periodic Ce Fastu? Ai cuatri numars di Sot la Nape, al Strolic e il Lunari, fin al boletin Scuele Furlane.

Pe publicazions fatis a coventaressin dôs pagjinis… tacant di Olmis, fin al libri su Lignan o su la Cjargne. La biblioteche e à un caratar regjonâl e a rispuint a cui che al domande un materiâl online. La didatiche e à metût adun 24 cors pratics di lenghe furlane, cul jutori de ARLeF, par 351 partecipants. La comunicazion e je stade curade tal Messaggero Veneto, dopo sul gjornâl La Voce Isontina, tal sît Internet, cuntune Newsletter pai socis e intai social networks, tant che Facebook. I progjets fats a son il Centri di racuelte, documentazion, ricercje e produzion de Scuele Furlane, dopo i lavôrs su la Vuere Grande tal Friûl e tal Litorâl austriac, une editorie digjitâl pai frutins e la Lavagne plurilengâl pai students de scuele superiôr.

E cetantis altri robis. E cetantis intervents dopo chel che nus à dit il president, Federico Vicario, cu la poie dal tesorîr Carlo Del Torre e dal diretôr Feliciano Medeot.

---

Fotografiis dal Grup di Facebook su la Filologjiche

Articul e networking par cure di Elio Varutti.

---

Riferiments par sgarfâ tal web

- Silvano Bertossi, Sappada in Friuli. La Filologica riapre la battaglia: il Parlamento voti il passaggio, «Messaggero Veneto», 6 marzo 2017, p. 26.

- Federico Vicario, Relazion pe assemblee dai socis de Societât Filologjiche Furlane, 2017.

- Elio Varutti, Sappamukki, festa dell’alpeggio. Sappada, 2016.

Strolic pal 2017 presentât a Udin li de Filologjiche

«Al è plui penç dal solit il Strolic pal 2017 – al à dit Federico Vicario, president de Societât Filologjiche Furlane – al è stât rincurât di Dani Pagnucco, cuntune redazion fate di Aldo Di Bernardo, Gianluca Franco e Annalisa Gasparotto».

Dani Pagnucco, Federico Rossi e Federico Vicario

Fevelin di un librut di 320 pagjinis, dutis in marilenghe. E je la edizion numar 98, stant che la socie e je nassude tal 1919 a Gurize.

Culì e si conte cualchi strolegaments, storiutis di ridi, ma ancje robis di biologjie, su la vite des plantis o pûr di filosofie. Dopo si pues lei tant di storie. Nuie mancul cualchi toc al è di astronomie, poesie, storie de Art, di teatri furlan e alc altri.

Fidrì dai Ros, clamât a screâ chest Strolic al à fevelât di une “opare messedade ben cun tantis rubrichis e dopo al è un strument par induvinâ il futûr di caratar tradizionâl e une vore popolâr, une volte al coventave ai contadins, par capî ben ce che si veve di fâ cui cjamps”.

Tra i tancj che  àn fevelât si pues nomenâ Odorico Serena, partît cu la filosofie antighe, o Angela Felice che, dut un cun Paolo Patui, e à contât tantis robis dal teatri furlan, tirant dentri ancje chê comedie “Amôr in canoniche” che tal passât e tirât sù lui di cinccent replichis. Gabriella Bucco, la uniche che e à doprât la lenghe taliane par contâ i siei intervents tal librut, che a son su la creativitât artistiche di fâ etichetis pes butiliis di vin, che a zirin pal mont, une specialitât dute furlane.

Tra un autôr e chel altri, e à cjacarât ancje Nila Braidotti, di Fontanebuine di Pagnà. Come ogni an. Cheste siore, aromai di 88 primeveris, e à volût dâ in regâl ae Filologjiche un ûf piturât di jê, simpri cun snait di artist.

L'intervent di Odorico Serena

Altris autôrs dal Strolic pal 2017 a son: Angelo Floramo, Antonino Danelutto, Gianni Colledani, Beppino Ponte, Aldo Tomè, Elisabetta Brunello Zanitti, Claudio Mattaloni, Giacomo Vit, Ermanno Dentesano, Monica Tallone, Mauro Fiorentin, Giannino Angeli, Carlo Zoldan e altris ancjemò.

Prime di lâ vie al è stât presentât ancje il Lunari pal 2017 dut fat cu lis cartulinis dal font de Filologjiche, cul intervent di Feliciano Medeot, diretôr de Societât Filologjiche Furlane.

La presentazion dal Strolic e je stade fate tal Salon d’onôr “Guglielmo Pelizzo”, di Palaç Mantica, in Vie Manin 18 a Udin, come te tradizion, la dì di Sante Catarine, ai 25 di Novembar, a lis cinc e mieze sore sere.

Angela Felice e nomene la comedie “Amôr in canoniche”

Gabriella Bucco e conte i siei intervents tal librut, che a son su la creativitât artistiche di fâ etichetis pes butiliis di vin, che a zirin pal mont, une specialitât dute furlane

Roberto da Cevraia al à fat la cuviertine dal Strolic e lis pituris che a son dentri il libri

La prime pagjine dal Lunari oal 2017

 Un ûf piturât di Nila Braidotti

Nila Braidotti, une femine che no mole mai! 

Foto di Leoleolulu

---

Servizi gjornalistic, fotografic e di networking par cure di Elio Varutti, se nol è scrit in maniere diferente.

---