Udin, presentât il Strolic pal 2020 de Societât Filologjiche Furlane

Al è stât Dani Pagnucco, il curadôr dal Strolic a tacâ la presentazion fate in public, tant che la tradizion ai 25 di Novembar dal 2019, la dì di Sante Catarine. Il Salon Pelizzo, tal plan nobil de Filologjiche, al jere plen di int, tant che a àn vierzût la stazie de presidence par fâ stâ altri socis. Mai viodude tante int tal Palaç Mantica di vie Manin a Udin, sede de Societât Filologjiche Furlane. Si viôt che il centenari de socie al sburte tancj a interessâsi de culture e de lenghe furlane.

Fontanini al berghele cuintri cui che al à puartât vie la Provincie, dongje Dani Pagnucco, Mauro Pascolini, Carlo Venuti e Feliciano Medeot, te sede de Societât Filologjiche Furlane, ae presentazion dal Strolic ai 25 di Novembar dal 2019. Foto di E. Varutti

Il Strolic furlan al à 285 pagjinis. A àn scrit dentri 80 autôrs, par plui di 180 tocs di riflessions, poesiis e storiutis di ridi. Mauro Pascolini, professôr di Gjeografie al à puartât il salût uficiâl di Roberto Pinton, retôr de Universitât dal Friûl. Il biel di chest librut a son lis varietâts de marilenghe. Si cjate il fevelâ di Gurize, di Soreli jevât, dal Friûl di Mieç, di Soreli a mont e cemût che a cjacarin in Cjargne, par esempli a For Davuatri, dut cu la finâl in “o”, tant che in antîc.

La novitât di chest an pal Strolic a son i dissens che a insiorin il test. Si trate des pituris di animâi gjavadis fûr dal manuscrit 220 te bergamine, clamât dai esperts “Epistolario di Antonio Panciera”, metût adun tal 1415 pal cardinâl Panciera di Çopule. Il biel manuscrit al è te Biblioteche Guarneriane, la prime pal public nassude in Italie. Propit Elisa Nervi, de Biblioteche Guarneriane di San Denêl, è à puartât il salût di cheste biele istituzion furlane. Al è stât il diretôr dal sodalizi, Feliciano Medeot, a fâ i coments su lis pituris dal Cuatricent, tant che la simie che e fâs di cuviertine al Strolic.

Pietro Fontanini, sindic di Udin, al à memoreât il fat che lis presentazions passadis dal Strolic si fasevin tal Salon de Provincie, tal Palaç Antonini Belgrado, plen di int ancje chel. “Ma la Provincie no esist plui – al à dit Fontanini – e je stade scancelade e cussì o sin ca a difindi la nestre lenghe e la identitât dal nestri popul cul fevelà e cui scrits par furlan”. Fontanini al si è fermât a fâ i compliments ae Filologjiche pes ativitâts di culture metudis adun, tant che il Strolic.

Dopo Pagnucco al à clamât a lei cuatri autôrs di ogni bande dal Friûl. Si son scoltadis cussì lis cjacaradis di San Vît di Âs (San Vito d’Asio, PN) cun Gianni Colledani. De bande sô Novella Del Fabbro e à fat sintî la bielissime fevelade di For Davuatri. Daspò Anna Madriz, di Gurize, e à let une conte in chê variante. La ultime a lei un toc dal Strolic e je stade Catine Tomasulo, tal sô lengaç fûr dal ordenari, come che al pues jessi par une fantate nassude in Basilicade e che à volût imparâ la marilenghe, cun un tic di spirt e di comicitât, che nol stâ mai mâl.

Al tache la serade Dani Pagnucco

Si à di notâ che al è intervignût ancje Gabrio Piemonte, dal Fogolâr furlan di Moscje e Claudio Petris, par lei une letare di un emigrant vie pal forest. Tal Strolic a si cjatin ancje lis esperiencis dai furlans che a son a vore vie pal mont.

I autôrs dal librut a son Gabriella Bucco, Gianni Colledani, Antonino Danelutto, Gianfranco Ellero, Gotart Mitri, Roberto Tirelli, Novella Del Fabbro, Angelo Floramo, Ubaldo Muzzatti, Celestino Vezi, Giacomo Vit e altris. I dissens a son di Annalisa Gasparotto, lis fotografiis a son di Giuliano Borghesan e Dario Quattrin e lis pituris di Otto D’Angelo.

Il professôr Federico Vicario, president de Societât Filologjiche Furlane, al à fevelât par ultin, discorint dal fat che la socie e je simpri plui dongje la int e cun lis istituzions dal teritori, come tal câs dal inovâl dal sodalizi, nassût cent agns indaûr a Gurize.

Udin, 25 di Novembar dal 2019, Federico Vicario, president de Societât Filologjiche Furlane, al siere la vivarose presentazion dal Strolic

---

Servizi gjornalistic, fotografic e di networking par cure di Elio Varutti. Ricercjis tal web cun la colaborazion di Sebastiano Pio Zucchiatti.

Cemût si fasial par notâsi cu la Societât Filologjiche Furlane? Frache culì, lei dut e cjape il tacuin.

Strolic pal 2017 presentât a Udin li de Filologjiche

«Al è plui penç dal solit il Strolic pal 2017 – al à dit Federico Vicario, president de Societât Filologjiche Furlane – al è stât rincurât di Dani Pagnucco, cuntune redazion fate di Aldo Di Bernardo, Gianluca Franco e Annalisa Gasparotto».

Dani Pagnucco, Federico Rossi e Federico Vicario

Fevelin di un librut di 320 pagjinis, dutis in marilenghe. E je la edizion numar 98, stant che la socie e je nassude tal 1919 a Gurize.

Culì e si conte cualchi strolegaments, storiutis di ridi, ma ancje robis di biologjie, su la vite des plantis o pûr di filosofie. Dopo si pues lei tant di storie. Nuie mancul cualchi toc al è di astronomie, poesie, storie de Art, di teatri furlan e alc altri.

Fidrì dai Ros, clamât a screâ chest Strolic al à fevelât di une “opare messedade ben cun tantis rubrichis e dopo al è un strument par induvinâ il futûr di caratar tradizionâl e une vore popolâr, une volte al coventave ai contadins, par capî ben ce che si veve di fâ cui cjamps”.

Tra i tancj che  àn fevelât si pues nomenâ Odorico Serena, partît cu la filosofie antighe, o Angela Felice che, dut un cun Paolo Patui, e à contât tantis robis dal teatri furlan, tirant dentri ancje chê comedie “Amôr in canoniche” che tal passât e tirât sù lui di cinccent replichis. Gabriella Bucco, la uniche che e à doprât la lenghe taliane par contâ i siei intervents tal librut, che a son su la creativitât artistiche di fâ etichetis pes butiliis di vin, che a zirin pal mont, une specialitât dute furlane.

Tra un autôr e chel altri, e à cjacarât ancje Nila Braidotti, di Fontanebuine di Pagnà. Come ogni an. Cheste siore, aromai di 88 primeveris, e à volût dâ in regâl ae Filologjiche un ûf piturât di jê, simpri cun snait di artist.

L'intervent di Odorico Serena

Altris autôrs dal Strolic pal 2017 a son: Angelo Floramo, Antonino Danelutto, Gianni Colledani, Beppino Ponte, Aldo Tomè, Elisabetta Brunello Zanitti, Claudio Mattaloni, Giacomo Vit, Ermanno Dentesano, Monica Tallone, Mauro Fiorentin, Giannino Angeli, Carlo Zoldan e altris ancjemò.

Prime di lâ vie al è stât presentât ancje il Lunari pal 2017 dut fat cu lis cartulinis dal font de Filologjiche, cul intervent di Feliciano Medeot, diretôr de Societât Filologjiche Furlane.

La presentazion dal Strolic e je stade fate tal Salon d’onôr “Guglielmo Pelizzo”, di Palaç Mantica, in Vie Manin 18 a Udin, come te tradizion, la dì di Sante Catarine, ai 25 di Novembar, a lis cinc e mieze sore sere.

Angela Felice e nomene la comedie “Amôr in canoniche”

Gabriella Bucco e conte i siei intervents tal librut, che a son su la creativitât artistiche di fâ etichetis pes butiliis di vin, che a zirin pal mont, une specialitât dute furlane

Roberto da Cevraia al à fat la cuviertine dal Strolic e lis pituris che a son dentri il libri

La prime pagjine dal Lunari oal 2017

 Un ûf piturât di Nila Braidotti

Nila Braidotti, une femine che no mole mai! 

Foto di Leoleolulu

---

Servizi gjornalistic, fotografic e di networking par cure di Elio Varutti, se nol è scrit in maniere diferente.

---