Il congrès di Flumisel La Vila de Societât Filologjiche Furlane pal 2020

Inte Ete dal Covid-19 la Societât Filologjiche Furlane e je rivade istès di meti adun il 97 in Congrès dai socis. Al è capitât a Flumisel La Vila, che par talian al sarès “Fiumicello-Villa Vicentina”. La riunion in presince si è davuelzude inte sale “Bison”, ai 4 di Otubar dal 2020. Prime si è tacât, a lis 9, cu la messe inte glesie di San Valantin, celebrade di don Dario Franco, cun mascarinis, savon licuit pes mans, distanziament sociâl e librut di preieris discjamât via email.

Flumisel La Vila - Intervent de sindiche Laura Sgobin; tal mieç Federico Vicario e, in bande, Ferruccio Tassin

A lis 10 in plaçâl dai Tigli si è sintût e viodût il bon acet in musiche par cure de bande “Tita Michelas”, direzude dal mestri Giorgio Cannistrà. Daspò i socis a si son metûts in file par jentrâ te sale dal congrès. No son plui i timps di salis plenis di int. Cumò si jentre dopo di vê misurât la fiere. Chei de Protezion Civîl (guai se a no fossin!) a ti metin in rie tant che tancj fantacins a un metri di distance un di chel altri. Dopo si à di scrivi un modul plen di crosutis. La uniche robe che no mi àn domandât al è il numar des scarpis, pal rest chei di Flumisel La Vila a san dut di me… ancje se ài spudacjât îr di sere.

Si è davuelzût cussì a Flumisel La Vila il 97in congrès de Societât Filologjiche Furlane, nassude a Gurize tal 1919. Si che duncje al si è passât il 100in inovâl de socie simpri plui indaûr a butâsi su lis ativitâts telematichis. Pensait che ae Scuele di Avost, dulà che par solit a erin 100 iscrits in presince, chest an, che si faseve dut su le taule on line (midiant Internet) i iscrits insegnants a son stâts passe 300 di lôr.

A àn cjantât te sale “Bison” di Vie Gramsci, chei dal grup corâl “Lorenzo Perosi”, direzût dal mestri Fulvia Miniussi. Oltri a Stelutis Alpinis di Arturo Zardini a si son scoltadis lis cjantis di chescj artiscj: Narcisio Miniussi, Cecilia Seghizzi e altris.

La bande "Tita Michelas"

Aes 11 e à tacât il congrès cul salût dai sorestants. E à cjacarât in marilenghe, par prime, il sindic di Flumisel La Vila, Laura Sgubin, dute braurose di ospitâ la Filologjiche pe prime volte. La Sgubin è à fevelât di “une ocasion di identitât pal paîs di Ugo Pellis, autôr dal Atlant Linguistic Italian”. Flumisel La Vila al è impuartant propit parcè che al è il teritori là ch’al nassè Ugo Pellis (1882-1943), benemerit dai studis furlans e un dai paris de Societât Filologjiche Furlane. Lui al è stât president de socie dal 1920 al 1923. Al à puartât il salût par furlan ai socis Tiziano Portelli, president de Cjasse rurâl dal Friûl Vignesie Julie.

Piero Mauro Zanin, president dal Consei regjonâl dal Friûl Vignesie Julie, al à fat un discors par talian. “Riconosco – al à dit – che la Società Filologica Friulana ha sviluppato e valorizzato la lingua friulana e il sentimento di appartenenza territoriale; è importante che il friulano sia insegnato nelle scuole”. Zanin al à ancje memoreât la cressite des oris in marilenghe tes trasmissions de Rai in radio e, buine gnove, la scree par television. Zanin al à ancje berghelât par fâ nassi un centri di produzion de RAI par furlan a Udin, par fâ il telegjornâl in marilenghe, tant ce che a fasin pai slovens.

Guido Germano Pettarin, deputât de Republiche elet a Flumisel, al à dit di “difindi la nestre lenghe, parcè che o sin furlans e europeans”. Pettarin al si bat tal parlament talian parcè che si voti la Cjarte europeane des lenghis minoritariis jenfri il 2023.

Grup corâl “Lorenzo Perosi”, direzût dal mestri Fulvia Miniussi

L’intervent centrâl “intun contest cussì dificil” al è stât la relazion dal professôr Federico Vicario, president de Societât Filologjiche Furlane. “O saludi ducj i rapresentants des istituzions furlanis – al à zontât Vicario – ch’a son chi cun nô. Dutis istituzions simpri dongje al nestri Istitût par ativâ colaborazions e inviâ progjets a pro de comunitât”. Tra lis variis esponents politics si è viodût Fabrizio Cigolot, assessôr ae Culture dal Comun di Udin; ancje Pordenon e Gurize a erin rapresentadis.  Daspò Vicario al à memoreât il ricercjadôr de universitât Giulio Regeni, copât dai polizais in Egjit, cence che nus contin la veretât; in sale a erin presints i gjenitôrs di Giulio ancjemò in spiete di justizie.

A chest pont al è stât presentât cuntun snait dut particolâr il Numar Unic “Flumisel La Vila” par cure di Ferruccio Tassin, un libri plen di gnovis sul paîs. Si fevele di 550 pagjinis, cun 40 contribûts scrits di passe 30 autôrs su la storie, l’ambient e la int dal teritori. Il program al proviodeve ancje un intervent di Nedi Tonzar cul titul: “Flumisel La Vila, di dulà che al ven, dulà che al va. Parcè visâsi dal ambient”. Il libri al è stât une vore agradît dal public.

Il regjist Dorino Minigutti (ultin a drete inte fotografie su disore) al à presentât, par talian, il so documentari “Ugo Pellis e l’Atlante della memoria”. Dilunc di dôs seradis a Flumisel (Sale Bison, martars ai 6 di Otubar dal 2020) e a La Vila (Sale Polifunzionâl, martars ai 13 di Otubar) al vignarà ancje presentât il Numar Unic "Flumisel La Vila".

Il gustâ in compagnie si è tignût li dal ristorant “Ragno d’Oro”, par passe 50 di lôr. Dopo di gustât, a lis cuatri: su la mascarine e vie a cjase. Apontament pal 2021, cul 98ⁱⁿ congrès, a Vençon. Cence Covid-19, sperin!

                    Al fevele Vicario

--

Servizi gjornalistic, fotografic e di butâ dentri tal blog in Internet ("networking") par cure di Elio Varutti. Letôr: Sebastiano Pio Zucchiatti. Graciis a Feliciano Medeot, diretôr de Societât Filologjiche Furlane.

IL DISCORS DAL PRESIDENT AL CONGRÈS DI FLUMISEL LA VILA  Flumisel La Vila, ai 4 di Otubar dal 2020, par leilu, frache culì.