lunedì 12 marzo 2018

Identitât e i politics di vuê. Assemblee de Societât Filologjiche Furlane 2018, Udin

Gnûf parlament di Rome e identitât furlane, chest al è il cantin burît fûr dal professôr Federico Vicario, president de Societât Filologjiche Furlane. Lu à fat inte assemblee dal sodalizi ai 1n di Març dal 2018. “Il Parlament talian al varès di vê un bon voli ae valorizazion de apartignince teritoriâl e une atenzion particolâr al mont de culture e de scuele” – chest in struc al è il pinsîr di Vicario.
Di çampe: Federico Pirone, Gianni Torrenti, Mario Pittoni e Lorenzo Pelizzo ae assemblee de Societât Filologjiche Furlane dal 2018

Al à contât ancje di une Filologjiche simpri plui digjitâl, stant il fat che a son simpri di plui lis relazions metudis adun cun Internet, cun Facebook, dulà che la pagjine de Filologjiche e à vût 5.380 clicadis di “Mi plâs”, cuntune visualizazion medie di ogni messaç cun 1.100 utents e cul messaç plui let di 4.451 visitadôrs.
Une batude e je stade fate ancje cuintri di Udin. “Ce fasial la citât par meretâsi la definizion di capitâl dal Friûl – al si è domandât Vicario – parcè che nol è mighe un dirit sore di nuie”.
A scoltâlu, in prime file, a erin i politics di chenti e tancj sociis de Filologjiche, une associazion, cun plui di 3.000 iscrits che a vivin pal plui in regjon, ma ancje vie pe Italie e tal forest. La assemblee pardabon è à votât il belanç consuntîf pal 2017, cence contrariis, e chel preventîf pal 2018, jenfri di un plan trienâl che a saran a disposizion tal sît Internet de socie, oltri che inte sedis sociâl di Udin, Pordenon e Gurize.
Il salon d’onôr “Pelizzo” dal Palaç Mantica di vie Manin a Udin, sede de Societât Filologjiche Furlane, al jere plen di socis par decidi su lis ativitâts dal sodalizi, nassût tal 1919 a Gurize. Siche duncje cul Comun di Udin e cun lis altris istituzions si pense al centenari de socie.
Vicario al à fat une relazion pal 2017 dute pontade su cetantis ativitâts metudis adun, simpri plui impuartantis, cun tante int e simpri di plui cun lis istituzions dal teritori, a dimostrazion che “la Societât Filologjiche e le la cjase de culture furlane". Dopo, tant che une litanie civîl, al à tacât a contâ ce che al è stât fat.
La Filologjiche tal 2017, dopo la assemblee ordenarie dai socis e à prontât la cuarte edizion de Setemane de Culture Furlane, dai 4 ai 14 di Mai dal 2017. Si fevele di 120 apontaments sparniçâts par ogni bande dal Friûl storic cun 42 conferencis e cunvignis, 16 mostris e visitis vuidadis, 11 spetacui e concierts e, nuie mancul, che 40 ocasions di gjoldi pai fruts, ancje tes bibliotechis dai paîs. A son stadis plui di cent manifestazions tai cjâf lûcs e in diviersis localitâts des provinciis di Udin, Pordenon, Gurize e ancje Belum, Trevîs e Vignesie, cjapant dentri lis comunitâts e lis associazions locâls, studiôs e apassionâts cultôrs di storie, tradizions, lenghe e leterature, art e musiche furlane.
Feliciano Medeot, tal ordenadôr, Federico Vicario e Carlo Del Torre

La Setemane de culture furlane e je stade patrocinade dal Ministeri dai Bens e des Ativitâts Culturâls e dal Turisim, de Regjon Friûl Vignesie Julie e dal Consei Regjonâl, di Turismo FVG, des provinciis e dai comuns interessâts, des Arcidiocesis di Udin e Gurize e de Diocesi di Concuardie-Pordenon, des bancjis di Credit Cooperatîf dal Friûl e des Fondazions Friuli e CARIGO. A àn colaborât 77 associazions culturâls, 16 plêfs e parochiis, 10 grups corâi e associazions musicâi, 7 museus, 8 Proloco e UTE, e 50 scuelis e istitûts comprensîfs. La prossime e cuinte edizion si tignarà dai 10 ai 20 di Mai dal 2018.
Dopo e je stade fate la Fraie de Vierte a Sedean ai 14 di Mai e il XCIV Congrès, ai 24 di Setembar, in chel di Mueç, cuntun sucès dal numar unic stampât pe ocasion cu lis firmis di Giuliana Pugnetti e Bruno Lucci.
Il sucès plui sflandorôs, pe Societât Filologjiche Furlane al è dât dai 497 iscrits ai Cors pratics di lenghe e culture furlane. Il 70 par cent e passe di lôr a son rivâts insom. Culì a àn insegnât 18 mestris in 22 localitâts: Cjampfuarmit, Cjarlins, Çarvignan, Cividât, Codroip, Colorêt di Montalban, Damâr, Flaiban - Merêt di Tombe – Sedean, Gurize, Manià, Mortean, Mueç,  Reane dal Rojâl, Romans dal Lusinç, Ruvigne, San Vît dal Tiliment, Sopule, Spilimberc, Tavagnà, Udin e Voleson Darzin (in Friûl Vignesie Julie).
Une altre biele ativitât e je chê dal servizi di gjestion dal Sportel Linguistic di Palme, San Zorç di Noiâr, San Zuan dal Nadison (in Friûl Vignesie Julie) e San Michel dal Tiliment (te regjon Venit). Tantis a son lis domandis par voltâ i tescj dal talian al furlan, oltri ae consulence, traduzion e revision de grafie.
No si à di dismenteâ il progjet Eduka 2 “Par un guvier transfrontalîr de istruzion”, inviât dal 1n di Setembar 2017, dentri dal program Interreg V-A Italie-Slovenie. E dopo al à vût sucès il seminari di aprofondiment su la Vuere Grande in Friûl Vignesie Julie, cun Laboratoris didatics intai Istitûts Comprensîfs e la publicazion di un fassicul.
Altris manifestazions che a meritin: la Fieste de Patrie dal Friûl, Marilenghe & Mariscuele a Codroip, la rassegne “Vicino / Lontano” di Udin, i Savôrs cun lis Pro Loco a Passarian, èStoria di Gurize, Friuli Doc a Udin, il Premi San Simon di Codroip e Leggimontagna di Tumieç.
Cinc a son i concors e premis de Filologjiche: il Premi Ciceri, XVIII edizion; il concors pe traduzion in marilenghe dal grêc e dal latin, XV edizion; il concors “Lenghis”, VII edizion; chel dedicât a Chino Ermacora, III edizion e l’ultin che al à par titul: “Presepis inte scuele dal Friûl Vignesie Julie”, XII edizion.
Dopo lis publicazions: dal periodic Ce Fastu? Ai cuatri numars di Sot la Nape, al Strolic e il Lunari, fin al boletin Scuele Furlane.
Pe publicazions fatis a coventaressin tantis pagjinis… tacant cul Diari di Olmis, o viodint “Pier Paolo Pasolini nelle parole di Giuseppe Marchetti”, ristampe anastatiche gjavade di Risultive 31, fin al libri sui “Oronimi del Friuli” di Barbara Cinausero Hofer e Ermano Dentesano e vie discorint. Baste viodilis tal sît Internet de Societât.
Il sît Internet de socie, in dôs versions linguistichis (talian e furlan) al à vût 22 mil e 962 visitadôrs de Italie e di altris 99 dai paîs forescj. Lis pagjinis viodudis a son stadis 121 mil e 169. Lis gnovis dal grup par Internet, o cemût che si dîs la “Newsletter” e à vût 55 numars di spedizion digjitâl in 2.436 direzion di pueste eletroniche. Nuie mâl par une clape di 3 mil sociis.
E cetantis altris robis. E cetantis intervents ancje impeverâts, dopo chel che nus à dit il president, Federico Vicario, cu la poie dal tesorîr Carlo Del Torre e dal diretôr Feliciano Medeot.
I politics che a àn tabaiât dopo di Vicario a son ducj intervignûts par talian, cui murmui dai sociis, che a àn gust di scoltâ dut il cjacarâ in marilenghe. Al à tacât Federico Pirone, assessôr ae Culture dal Comun di Udin, memoreant il jutori dal so ent pal centenari de Filologjiche. Dopo al à dit alc sul sisteme des 25 bibliotechis dal dulintor di Udin par vie che al si clamarà “Sisteme des bibliotechis dal Friûl”. Al à ancje fevelât des trasmissions par furlan dentri de RAI.
Gianni Torrenti, assessôr ae Culture de Regjon Autonome Friûl Vignesie Julie – che e da la plui part dai contribûts al sodalizi – al si è complimentât pes ativitâts. Ancje lui al à dit alc su la convenzion cu la RAI pes trasmissions par furlan e al à criticât la Universitât di Udin parcè che no fâs masse a pro de marilenghe.
Mario Pittoni, senatôr fresc di elezion pal partît de “Lega”, al à memoreât il salvament fat e Universitât furlane daspò de crisi dal 2008. Dopo al à batût sul fat di tornâ a vê un Diretôr scolastic regjonâl, se il so partît al fasarà il guvier.
La plui sclete gnove di cheste assemblee, par gno cont, e je rivade dai intervents des dipendents feminis de struture. Katia Bertoni, bibliotecarie de Filologjiche, e à mostrât cemût che si à di fâ par cirî tal sît web dal sodalizi un articul digjitalizât, stant la incressite dal servizi di “document delivery” (staie a dî propit il mût di lei un test cul ordenadôr o computer tacât a Internet). A son stadis 12 mil e 439 lis domandis di chest tip di servizi, il dopli dal an passât.
Antonella Ottogalli e à tabaiât dai progjets specifics dal Centri di documentazion, ricercje e sperimentazion didatiche pe scuele furlane (a pene screât, ma za un lusorôs di vite formative) cun lis centenârs di iscrizion di mestris e di insegnants a lis iniziativis comprendude la Scuele di Avost a Aplis di Davâr cuntun centenâr di educadôrs. Al è stât presentât il gnûf sît di scuele furlane, clamât propit: scuelefurlane.it
Alessandra Piani è à contât dute la schirie di ents e grups di culture che a fasaran la Setemane de culture furlane tal mês di Mai dal 2018, dulà che a saran proviodûts events ancje in colaborazion cui Fogolârs Furlans di Milan e di Rome.

Cumò vonde. Si viodarìn a Budoie e a Colorêt. Propit ai 20 di Mai al è un altri apontament dal sodalizi, la Fraie de Vierte a Budoie e al 1n di Otubar dal 2018 il XCV congrès sociâl a Colorêt.

La bibliotecarie Katia Bertoni e mostre, cuntun tic di snait, un test furlan tirât su in Internet dal sît dal sodalizi

Antonella Ottogalli e dislpee la scree dal Centri di documentazion, ricercje e sperimentazion didatiche pe scuele furlane

Alessandra Piani cul simbul de Setemane de culture furlane prontade pal Mai dal 2018


Riferiments par sgarfâ tal web

- Fabiana Dalla Valle, L'attacco della Filologica: “Udine fa di tutto per essere meno friulana di quello che è”, «Messaggero Veneto» dai 12 di Març dal 2018.

Federico Vicario, Assemblee 2018, la relazion morâl dal President, tal web dai 12 di Març dal 2018.

- Elio Varutti, Assemblee de Societât Filologjiche Furlane 2017, Udin, tal web dai 8 di Març dal 2017.

- E. Varutti, La Setemane de Culture Furlane in Friûl, IV edizion, tal web dai 27 di Avrîl dal 2017.

--

Servizi gjornalistic, fotografic e di networking par cure di Elio Varutti. Ricercjis tal web cun la colaborazion di Sebastiano Pio Zucchiatti.