martedì 26 settembre 2017

Congrès a Mueç pe Societât Filologjiche Furlane pal 2017

Nol è facil di viodi une sale plene di int cu la bocje vierte in scolte dal relatôr e cence nissun a sgarfâ tal telefonut celulâr. Al è capitât a Giovanni Frau, professôr emerit de Universitât dal Friûl, tant che al fevelave di “Mueç, paîs di lenghe furlane cun non di origjine slave?”.
Di çampe: Diego Navarria e il sindic di Mueç Giorgio Filaferro. A drete: Sergio Bolzonello

Al è stât cussì clâr e brâf a displeâ che invezit il non di Mueç al ven dal latin “Modium”, che al jere une misure agrarie. Dopo la peraule e je passade dentri la antighe lenghe sclave e cussì al somee che Mueç e sedi di divignince di di la dal Lusinç. Mueç al è “Moggio Udinese” par talian.
Al jere un plasè viodi ducj atents: i sorestants in prime file, dongje di un grup di alpins cul cjapiel poiât su lis gjambis e daûr dute la int di Mueç e de Filologjiche, cun tancj di lôr in pîts, parcè che a erin finidis lis cjadreis. Sergio Bolzonello, vice president de Regjon Autonome Friûl Vignesie Julie, di tant che al jere interessât de lezion di Frau al cjapave note su un sfueut tant che un Remigjin tal prin dì di scuele. A dimostrazion che Frau cuant che al cjacare, ce tant che al è brâf, al cjape il cûr, prime che il cerviel.
Si è davuelzût cussì a Mueç il 94in congrès de Societât Filologjiche Furlane, nassude a Gurize tal 1919. Si che duncje al si svicine il 100in inovâl de socie.
Dut al è scomençât te Badie di San Gjal cu la Sante Messe in marilenghe di Bonsignôr Guido Genero, cul compagnament de Corâl di Sante Marie Maiôr di Spilimberc direzude dal mestri Ilvia Mulloni. La basiliche e jere sglonfe di int, cuntune coriere molade la fûr tal parc des machinis, di tante int che e jere vignude.
Bons. Guido Genero te Basiliche di Mueç

Aes 11, inte sale polifunzionâl “R. Treu” di Vie Rome, e à tacât il congrès cul salût dai sorestants. Al à cjacarât par prin Giorgio Filaferro, sindic di Mueç, un tic emozionât par saludâ lis autoritâts presints. «E je la prime volte che o feveli par furlan in un event public – al à dit il sindic – e mi visi che cuant che o jeri zovin o fevelavi in marilenghe e mi domandavin, par cjolimi intor: di dulà sêstu cun che fevelade?» Dopo al è intervignût Renato Valent, president de Pro Loco di Mueç, un grup che al à tant lavorât pe zornade dal congrès.
Adriano Lucci, president dal ent “Friuli nel Mondo”, nassût di une cueste de Societât Filologjiche Furlane, al à dit che la colaborazion tra i ents e à di jessi ancjemò plui fuarte.
La Corâl di Sante Marie Maiôr di Spilimberc direzude dal mestri Ilvia Mulloni

L’intervent centrâl al è stât la relazion dal professôr Federico Vicario, president de Societât Filologjiche Furlane. «E propri pensant ae unitât de comunitât furlane – al à dit Vicario – us dîs, prime di dut: biade l’ore! Sì, biade l’ore che il Senât al à votât la norme par fâ tornâ Sapade te sô regjon storiche e naturâl, valadî il Friûl – no sai se al è il câs di comentâ il fat che l’unic vôt cuintri a cheste risoluzion (rispiet ai 187 a pro e ai siet o vot astignûts, se mi visi ben) al è stât chel di un senadôr elet in Friûl (no dîs ch’al è “furlan”, parcè che no sal merte)».
«O saludi ancje altris rapresentants di istituzions furlanis – al à zontât Vicario – ch’a son chi cun nô, il President des Prolocos, Valter Pezzarini, il Delegât pe lenghe furlane de nestre Universitât, l’amì Enrico Peterlunger, il President dal ARLeF, Lorenzo Fabbro, il President de Assemblee de Comunitât lenghistiche furlane, Diego Navarria, dutis istituzions simpri dongje al nestri Istitût par ativâ colaborazions e inviâ progjets a pro de comunitât. Il discors de colaborazion cu la Fondazion Friûl al è impuartant, fondamentâl par nô. Us conti dome chest fat. Joibe e vinars – îr l’altri – o jeri jù a Triest pe cunvigne anuâl de Associazion dai Istitûts di culture d’Italie, l’AICI, la cunvigne “Italia è Cultura. La cultura e l’identità europea” inmaneade cu la poie dal Ministeri pai Bens culturâi e cul jutori de nestre Regjon – e chi o vin di ringraziâ l’Assessôr ae Culture Gianni Torrenti, che lu saludi ancje lui. In ocasion de Assemblee di cheste Associazion, ch’e conte passe cent istitûts e fondazions di culture in dute Italie, mi àn invidât a tignî une relazion di salût, par dâ il benvignût te nestre Regjon tant che President dal unic istitût associât, apont, a cheste organizazion»
Di çampe: Giovanni Frau, Federico Vicario, Giorgio Filaferro, Bruno Lucci e Giuliana Pugnetti

Scoltant di Sapade che e à di tornâ tal Friûl, no i pareve vêr a Bolzonello che alore al à fevelât par tirâ dongje in Friûl i Comuns dal Mandament di Puart, che a jerin tal teritori dal Patriarcjât di Aquilee e dopo cu la Diocesi di Concuardie Pordenon. Sore di dut Bolzonello al à fevelât ben de “Setemane de Culture Furlane” prontade de Filologjiche cun cetancj grops, parochiis, scuelis, bibliotechis e ents locâi, ancje di fûr dal Friûl, par sclarî la impuartance de marilenghe e des lidrîs de nestre divignince cun 121 apontaments. In sale a erin ancje Franco Iacop, president dal Consei regjonâl e Gianni Torrenti, assessôr ae Culture de regjon. «Une biele patulie regjonâl» al à dit cualchidun.
A chest pont al è stât presentât il Numar Unic “Mueç” par cure di Giuliana Pugnetti e Bruno Lucci, un libri plen di gnovis sul paîs cussì dongje de Cjargne. Il libri al è stât une vore agradît dal public.
La sale sglonfe di int

Dopo si è passât a dâ il Premi “Andreina e Luigi Ciceri”, XVIII edizion, pal concors di scrits e materiâi multimediâi sui aspiets de culture e dal teritori dal Friûl. Inte sezion dai “Scrits” a son stâts premiâts Claudio Cotrufo, cul titul: “Materiali costruttivi nella pedemontana orientale nel Medioevo. L’utilizzo della pietra nelle valli del Grivò e del Malina”. Une premiade ancje di colôr di rose cun Annalisa Baldassi, cul titul: “Il quaderno d’imbreviature del notaio Giorgio Dell’Oste da Codroipo, 1370-1372. Studio ed edizione”.
Inte sezionMateriâi multimediâi” a àn cjapât il premi Dorino Minigutti e Giorgio Cantoni cul lavôr dal titul: “Int/Art A la serie: musiche”.
Alpins in prime file

Il gustâ in compagnie si è tignût li dal ristorant “Al Kampo” e, stant che no erin plui puescj, ancje tal albierc ristorant “Al Leon Bianco”, par passe 170 di lôr.
Dopo di gustât, a lis cuatri a si fasevin lis visitis ae scuvierte dal teritori: 1) al complès abadial (Badie e Anticuarion). 2) Mostre “Mario Micossi. Opere a Moggio e dintorni” inte Tor medievâl. 3) Mostre “Moggio Udinese nella Grande Guerra. L’inattesa svolta 1917-1923”, li de viele scuele elementâr.
Apontament pal 2018, cul 95in congrès, a Colorêt di Mont Alban!
Une schirie di sorestants. Tal mieç de foto: Sergio Bolzonello
---
Par cui che al à voie di viodi, in marilenghe, dute la relazion di Federico Vicario fracait culì.
---
Servizi gjornalistic, fotografic e di butâ dentri in Internet ("networking") par cure di Elio Varutti
L'intervent par talian di Sergio Bolzonello, sot dai voi di Giovanni Frau

Federico Vicario, Gianni Torrenti, assessôr ae Culture de regjon, e i premiâts "Ciceri 2017" Dorino Minigutti e Giorgio Cantoni

Chei dal Premi “Andreina e Luigi Ciceri” cun, a drete, Sergio Bolzonello: di çampe, Dorino Minigutti, Giorgio Cantoni, Annalisa Baldassi e Donatella Cozzi, president de Jurie

Federico Vicario intervistât de RAI regjonâl al congrès di Mueç

Mueç 2017 - Lis frutis de segretarie de Societât Filologjiche Furlane: di çampe, Elena De Sanctis, Alessandra Piani, Marilena Desio e Daniela Piva. In altris peraulis a son dome un toc dal "staff", cognossudis tant che "Lis Marilenis". Par esempli al mancje il Diretôr de Filologjiche, Feliciano Medeot e altris

La glesie sglonfe di int

Ducj cidins, che al fevele Giovanni Frau, clâr tant che la aghe

---
Rassegna stampa.