Il libri antologjic di
poesie di Galliano Zof al è stât presentât ai 1n di Avrîl dal 2016. Al è sucedût tal
Palaç Belgrât, la sede de Provincie di Udin, cul salût uficiâl dal sô
president, Pietro Fontanini. Culì a si pues viodi lu invît de Provincie di Udin e presentazion.
Pietro Fontanini al presente il libri di Galliano Zof. Dongje di lui Donatella
Urban, assessôr ae Culture dal Comun di Sante Marie la Lungje e, plui in la, Manuela Quaglia, curadore dal volum. E ancje Luigi
Geromet, president dal Istitût “Achille Tellini” e Odorico Serena, amì dal poete
Mai la fieste de Patrie
dal Friûl, che si celebre a ogni 3 di Avrîl, stant che tal 1077 al è stât screât tant che Patrie dal Friûl, e podeve scomençâ cussì ben tal Salon dal
Consei provinciâl di Udin. Il gnûf libri al à par titul: “Il gno jessi tal
mont. Il mio stare al mondo. Poesiis. Poesie (1966-2009)”, par cure / a cura di
Manuela Quaglia, Istitût “Achille Tellini”, Manzan (UD) / Istituto “Achille
Tellini”, Manzano (UD), 2015, di 434 pagjinis.
L’autôr al è nassût a
Sante Marie la Lungje tal 1933 e muart tal 2012. Al è stât un om di scuele, ancje
preside e de culture furlane.
Te sô presentazion
l’onorevul Fontanini, dopo di vê fat i compliments pe jessude de opare, nol à
mancjât di lagnâsi pe sielte grafiche doprade tal libri improntade su dôs
grafiis: chê origjinâl di Zof e chê de koinè. «Chest libri al è impuartant pe
culture furlane, ma o vin di lâ indevant cuntune grafie uniche – al à dit
Pietro Fontanini – propit la Provincie di Udin e à sburtât dai agns otante dal
Nûfcent par cjatâ un mût di scrivi che al vadi ben a ducj i furlans, no vin di
spaventâ chei che si metin a lei un libri in marilenghe, chei che a si svicinin
pe prime volte ae marilenghe mostrantju dôs manieris di scrivi, che a son
diferentis di chel uficiâl aromai dal 1996 e ricognossût dai ent publics par dâ
un finanziament aes iniziativis di caratar culturâl».
Il public tal Salon di Palaç Belgrât a Udin ai 1n di Avrîl dal 2016
Oltri a Fontanini al à
fevelât Luigi Geromet, president dal Istitût “Achille Tellini”, nassût tal 1992
par meti adun la culture de int e lis tradizions dal popul. Al è rivât a stampâ nuie mancul che 17 volums
sui mîts, su lis liendis dal Friûl storic. Geromet al à dit che: «Zof al è un
protagonist de culture e de lenghe furlane e dentri a chest libri a si cjatin
plui di 40 agns di impegn leterari e culturâl dal poete». Il president Geromet
si à cjapât la colpe de sielte di publicâ il libri di Zof in dôs grafiis
diferentis ma al al à dit che è plui impuartant «che si fâsi la presentazion
des poesiis di Zof inte suaze de fieste de Patrie dal Friûl».
E à cjapât la peraule
dopo Donatella Urban, assessôr ae Culture dal Comun di Sante Marie la Lungje,
paîs natîf di Galliano Zof. E à fevelât benissim in marilenghe, ancje se e jere
un tic spauride tal principi (e à dit), par vie che i vignive di fâ un
intervent istituzionâl in lenghe taliane, par memorâ ben il grant poete Zof. Al
è stât miôr cussì. Dome ae fin dal discors
e je passade plancut a cjacarâ par talian, cussì a capivin ducj chei che
a jerin in sale. Ma il public al jere di furlans e vonde! «Chestis poesiis – e
à concludût la Urban – a son stadis presentadis ancje in paîs tal 2013, cuntune
vore di sucès, al è stât un moment di incressite par dute la int di Sante Marie
la Lungje». Dopo la assessore e à comunicât che il Comun al à decidût si scrivi
la poesie “Jessi” suntun mûr di une cjase dal paîs, parcè che ducj a vegnin a
cognossi la impuartance dal poete paisan Zof.
A chel pont la curadore
de publicazion, Manuela Quaglia, e à tacât a fevelâ inte sô bielissime variante
cjargnele di Neariis di Sudri. E à fevelât di cheste racuelte di poesiis di
Galliano Zof dal 1966 a 2009. «O ai cognossût Galliano Zof tal 2002 – e à dit
Quaglia – e jere une persone di grant culture, fevelâ cun lui e jere come lâ a
scuele, si imparave tant. Alore mi àn dât a mi il compit di meti adun la sô
opare poetiche e o ai lavorâ par plui di un an e mieç cu la colaborazion di
Paola, la femine dal poete, che e à savût cjatâ las peraulas justas par voltâ lis poesiis che a jerin par talian.
La sielte di doprâ dôs version di grafie no è stade lizere, o vin operât cussì
par vie che i materiâi a jerin tancj e in dôs versions, taliane e furlane, cu
la grafie di Zof. Lui al veve preparât ancje un menabò, o progjet di stampe,
dal libri prime di murî e cussì o vin lavorâ ancje cun chel imprest».
Par Odorico Serena, amì
di Galliano, oltri che om di scuele e di culture, sierâ lis relazions de
incuintri al è stât un onôr e un impegn. «Pensait – al à dit Serena – che par
Gianfranco D’Aronco chest libri al è un regâl pai furlans, tant al è impuartant
e dentri o cjatarès lis fotografiis di Carlo Innocenti, un fotograf di sest,
come che al voleve Galliano Zof. Dopo al à ilustrât i temis dal libri, come la
religjositât, la identitât, la tradizion contadine, la linguistiche, la famee e
i afiets. Cheste è je une poesie sociâl».
Ancje il filosof Sergio
Sarti al veve esprimût valutazions positivis su la poesie di Zof, che al è stât
autôr ancje di didatiche, di architeture spontanie e di teatri. Tal 1988 Zof al
è stât tra i fondadôrs dal moviment leterari di “Cjarande”, cun Domenico Zanier
e Mario Argante. Al è un fat impuartant memoreâsi di lui tal 939m de nassite de
Patrie dal Friûl burint fûr un libri cun dute la sô produzion poetiche.
Par sierâ la biele
riunion la Associazion “I Viandants” di Basilian e à fat un zîr di leturis
senichis ispiradis ae opare poetiche di Galliano Zof.
---
BIOGRAFIE - Galliano
Zof, nassût ai 26 di Avost dal 1933, indotorâts in Letaris modernis e dopo in Filosofie, al à
simpri vivût a Sante Marie la Lungje. Al
è stât insegnant di materiis leterariis e preside di scuele mezane. Cuant che
al jere preside a Manzan al à dât un grues jutori aes iniziativis promovudis de
aministrazion comunâl e al è stât te zurie dal premi leterari "Caterina
Percoto".
Passionât di storie e
des tradizions dal Friûl al è stât un dai fondadôrs dal Istitût pe Ricercje e
la Promozion de civiltât furlane “Achille Tellini". Tal 1967 al à fat cun
Mario Argante e Domenico Zannier il moviment leterari "La Cjarande".
Al à scrit, tra lis altris "De bande dai Siôrs" e "Contadinance", dulà che
al denunzie lis cundizions di miserie, la fadie e i dolôrs dal popul contadin.
Zof al è stât un sclet poete in marilenghe, nol à mai neât lis sô origjins
semplicis, anzit a ‘nd à esaltât i siei valôrs. Al è muart ai 9 di Avost dal 2012.
---
Servizi gjornalistic e
des fotografiis di Elio Varutti
La Associazion “I Viandants” di Basilian e à fat un zîr di leturis senichis ispiradis ae opare poetiche di Galliano Zof.
Nessun commento:
Posta un commento